Keshe elordada Beıbitshilik jáne kelisim saraıynda TMD memleketteri jolshylarynyń úkimetaralyq keńesiniń HHHII otyrysy bolyp ótti. Ony elimizdiń Kólik jáne kommýnıkasııa mınıstri Berik Kamalıev júrgizip otyrdy. Astanaǵa atbasyn tiregen áriptesterin quttyqtaǵan vedomstvo basshysy olarǵa Premer-Mınıstr Kárim Másimovtiń quttyqtaý hatyn oqyp berdi.
Bul basqosýda TMD elderiniń jol sharýashylyǵynyń normatıvtik bazasyn jetildirý máseleleri talqylanyp, TMD halyqaralyq avtomobıl joldary jáne olardyń shekaralas memleketter shekaralaryna kelýin damytý týraly hattamany iske asyrý nátıjeleri qaraldy. Sondaı-aq, assosıasııalanǵan keńes múshelerine ınnovasııalyq tehnologııalardy engizý máselesi qaraldy. Bul máseleni talqylaý barysynda TMD elderinde mamandandyrylǵan semınarlar men kórmeler ótkizý kezinde ınnovasııalyq sheshimderdi keń jáne tıimdi usynýdy qamtamasyz etilýi belgilendi.
Atalǵan úkimetaralyq salalyq organnyń basty maqsaty – jalpy qoldanystaǵy avtomobıl joldary jelisin damytý men jetildirý, jol uıymdarynyń óndiristik jáne ǵylymı-tehnıkalyq áleýetin tolyq paıdalaný úshin jaǵdaılar jasaýǵa saıady. Sonymen qatar, kelisilgen jol saıasatyn júrgizýdegi úkimettiń kúsh-jigerine, ıntegrasııalyq úrdisterdiń tereńdeýine jáne kadrlardy daıarlaý deńgeıin kóterýge qoldaý kórsetý bolyp tabylady. Munan keıin jolshylardyń úkimetaralyq keńesi «Halyqaralyq kólik dálizderiniń ınnovasııalyq damýy» taqyrybynda halyqaralyq ǵylymı-tájirıbelik konferensııasymen óz jalǵasyn tapty.
Bıylǵy jyly TMD-nyń 20 jyldyǵyn toılaýǵa baılanysty keńes osy oqıǵaǵa arnalǵan birqatar is-sharalar ótkizýdi nazarda ustaǵan. Onyń ishinde, qazirgi kúni Astanadaǵy «Kórme» kórmeler kesheninde ótip jatqan VIII «QazAvtojol-2011» halyqaralyq kórmesi bar. Sonymen birge aıtýly dataǵa oraı aldaǵy ýaqytta II «Jol» halyqaralyq mamandandyrylǵan kórme-forým (Máskeý), «Táýelsiz Memleketter Dostastyǵyna 20 jyl» atty halyqaralyq ǵylymı-tájirıbelik konferensııa (Mınsk) jáne TMD memleketterindegi «TMD aptasy» is-sharalaryn ótkizý josparlanǵan.
Ábdirahman QYDYRBEK.