15 aqpan kúni Aýǵan soǵysynda qaza batqan bozdaqtardyń rýhyna taǵzym jasaldy. Almatydaǵy 28 gvardııalyq-panfılovshylar saıabaǵynda ótken sharaǵa Halyq Qaharmany, general-leıtenant Baqytjan Ertaev bastaǵan aýǵandyq ardagerler men qaladaǵy mektepterdiń áskerı-patrıottyq klýbtarynyń músheleri qatysty.
1979 jyldyń 25 jeltoqsanynda bastalyp, týra on jylǵa sozylǵan Aýǵan órtine shekarashylar da qatysqan. Muny bólimshe basqaryp júrgen jerinen otrıadqa aýystyrylyp, ári qaraı Aýǵanstanǵa attanyp kete barǵan general-maıor Q. Berqalıevtiń shekaraǵa arnalǵan sanaly ǵumyrynan bilemiz. Shekara qyzmetiniń qabyrǵasyn óz qolymen qalaǵan general-leıtenant B. Zákıevti de atap óte alamyz.
General-leıtenant, Halyq qaharmany B. Ertaev Aýǵan soǵysynyń zardaby týraly aıta kelip, «Keýdesin oqqa tosqan erlerdiń kózsiz erligi umytylmaıtynyn aıtty.
Elordada tájik-aýǵan shekarasynda qaza tapqan jaýyngerler rýhyna taǵzym etildi
Jıynda sóz alǵan UQK Shekara qyzmetiniń ardageri, general-maıor Marat Majıtov, Almaty qalasy ardagerler uıymdarynyń uıymdastyrý keńesiniń jáne «Kók baıraq» qoǵamdyq birlestiginiń tóraǵasy Áýez Beısenbaev, Almaty qalalyq Aýǵanstan ardagerleri keńesiniń tóraǵasy Murat Abdýshýkýrovtar búgingi kúnniń mańyzyna keńinen toqtaldy.
Tarıhqa júginsek, qabyrǵany qaıystyrar sol soǵysty 32 myńnan astam otandasymyz basynan ótkeripti. Onyń 927-si qaza taýyp, 19-y habarsyz ketti. Myńdaǵan adam týǵan úıine múgedek bolyp oraldy. Bes otandasymyz – Keńes Odaǵynyń batyry, bireýine Halyq qaharmany ataǵy berilse, eki jaýynger «Aıbyn» ordenimen marapattalǵan.
Úndi muhıtyna jol: Qazaqstan Aýǵanstan arqyly temirjol salmaq
Bir mınýt únsizdikten soń aýǵandyq ardagerler «Máńgilik alaý» monýmentine gúl shoqtaryn qoıyp, tereń dástúrge saı, Uly Otan soǵysynyń batyrlaryna qurmet kórsetken. Muny UQK Shekara qyzmeti Almaty oblysy boıynsha departamentiniń janynan qurylǵan «Jas shekarashy» áskerı-patrıottyq klýbynyń kadetteri de aına-qatesiz qaıtalaǵan. Bul da jas urpaqty patrıottyq rýhqa tárbıeleýdiń tamasha úlgisi. Sonymen qatar búgingi sharaǵa shekarashy ardagerlerdiń «Zastava tarlandary» respýblıkalyq qoǵamdyq birlestiginiń Almaty qalalyq jáne oblystyq fılıaldarynyń músheleri de qatysqan. Aıta keterligi, atalmysh qoǵamǵa múshe shekarashylardyń arasynda da Aýǵanstan jerinde bolǵan ardagerler az emes. Búgingi tarıhı kúnge oraı, saıabaqta bas qosqan ardagerler «Taǵzym» sharasyna qatysýmen shektelmeı, ózderiniń qarýlastaryn kezdestirip, ózderiniń Aýǵan jerindegi aýyr kúnderin eske alǵandary haq. Tarıh – sosyn da ómirsheń!
Shara sońynda «Jas shekarashy» áskerı-patrıttyq klýbynyń músheleri, bizdiń bolashaq izbasarlarymyz Aýǵanstanda qaza tapqan jaýyngerlerdiń eskertkishiniń aldynan saltanatty sap túzep ótti.
Tamara Dáýletbaeva
UQK Shekara qyzmetiniń zapastaǵy podpolkovnıgi