Qaraǵandy qalasyna kún kózinen qýat alatyn kóshe ataýlary jazylǵan taqtaıshalar ornatylyp jatyr. Kóshe úılerine jalpy eki jarym myń taqtaısha ornatylady, onyń 900-i janynda ornatylǵan kún batareıalarynyń arqasynda jaryqtandyrylyp turmaq. Ázirge mundaı anshlagtar qalanyń ortalyq kóshelerine josparlanypty. Basqa jerlerde olar elektr jelisine qosylady.
Jalpy, bul jobaǵa 70 mln teńge bólingen, onyń 40 mıllıony kún batareıasy bar anshlagtarǵa jumsalmaq. Sońǵylarynyń eki jyldyq kepildigi bar.
– Bizge zamanǵa saı qadam basatyn kez keldi, – dep túsindirdi taqtaıshalardyń qajettiligi týraly Oktıabr aýdanynyń ákimi Álimjan Qanaev. – Álemdik elderdiń tájirıbelerin qabyldaýymyz kerek. Sonymen qatar, júrgizýshilerden túngi ýaqyttarda úılerdegi kóshe ataýlary bar taqtaıshalary kórinbeıtini týraly shaǵym jıi túsedi. Sebebi, olardy kólik shamdarymen jaryqtandyrý múmkin emes, olar joǵary ornalasqan. Sondyqtan jaryqtandyrylǵan taqtaıshalar qajet. Al kún batareıalary zamanǵa saı jáne ekologııalyq jaǵynan da tıimdi bolyp tabylady.
Mıras ASAN, «Egemen Qazaqstan»
Qaraǵandy oblysy