Elimizdegi toqyma óndirisindegi kóshbasshylardyń biri - «OxyTextile» JShS-i jumys aıasyn keńeıtti. Bul maqsatta «Azala Cotton» men «OxyTextile» JShS-i barlyq múliktik keshenin biriktirip, «Azala Cotton» JShS bolyp qaıta qurylyp otyr, dep habarlady OQO ákiminiń baspasóz qyzmeti.
Aıta keteıik, «Azala Cotton» JShS fabrıkanyń qyzmetin qaıta jandandyrý boıynsha 2017 jyldyń naýryz aıynda ınfraqurylym, qural jabdyqtar jáne óndiristik sıkldi qalpyna keltirý jumystaryn júrgizgen bolatyn.
Qazirgi tańda qondyrǵylardy iske qosý jumystary aıaqtaldy. Búginde atalǵan kásiporynda 300-ge jýyq adam jumys isteıdi. Jalpy, kásiporyn jylyna 6 myń tonna kardalyq jáne taralǵan maqta ıirim jipterin óndirýge qaýqarly. Zaýyt ónimderi TMD men alys-jaqyn shetelderge eksporttalady dep josparlanýda. Jobaǵa tartylǵan jalpy ınvestısııanyń kólemi - 5,4 mlrd.teńgeni quraıdy.