«Respýblıka boıynsha alty aıdyń ishinde 47 738 baspana paıdalanýǵa berildi. Atalǵan kórsetkish ótken jylmen salystyrǵanda 11 paıyzǵa artyq. Turǵyn úılerdi paıdalanýǵa berý jaǵynan Astana men Almaty qalalary oq boıy ozyq keledi. Astanada 1,5 mln sharshy metr baspana paıdalanýǵa berilse, Almaty 928 myń sharshy metr turǵyn úı saldy. Budan bólek, Mańǵystaý men Ońtústik Qazaqstan oblystaryn atap ótken jón», deıdi Jeńis Qasymbek.
Mınıstrdiń sózine qaraǵanda, basqa aımaqtarda da turǵyn úı qurylysynyń jandanýy baıqalady. Alaıda, Almaty men Pavlodar oblystarynda baspanany paıdalanýǵa berý jumysy artta qalǵan.
«Qazirgi kezde salynyp jatqan qurylys nysandaryn ýaqytynda tapsyrý úshin aımaqtarǵa 33 mlrd 800 mln teńge aýdaryldy. Sonyń 29 mlrd 300 mln teńgesi ıgerildi. Jalpy, respýblıka boıynsha 3 633 shaqyrym ınjenerlik jelilerde tartý josparlanyp otyr. Ákimdikterdiń qazirgi málimetine sáıkes, osy ýaqytqa deıin 1 436 shaqyrym jeli tartyldy», dep atap kórsetti mınıstr Qasymbek.
Aıta ketken jón, turǵyn úı salý úshin jaryq, sý jáne taǵy basqa ınjenerlik jeliler bolýy shart. Búginde sol jelilerdi salý jaǵynan Qaraǵandy, Ońtústik Qazaqstan, Aqmola men Batys Qazaqstan oblystary baıaý jumys jasap keledi.