Almaty oblysynyń Qaskeleń qalasynda álemdik deńgeıdegi «Dala Stage» kınopavılonynyń qurylysy bastaldy. Bul joba óńirdiń ǵana emes, tutas eldiń kreatıvti ındýstrııasyn jańa deńgeıge kóterýge baǵyttalǵan mańyzdy qadam bolyp otyr, dep jazady Egemen.kz.
Saltanatty rásim barysynda Gollıvýd juldyzy Djekı Chan jibergen sımvolıkalyq ýaqyt kapsýlasy qurylys alańyna tikushaqpen jetkizildi. Ony pavılonda túsiriletin alǵashqy joba – «Qudiretti saýyt-saıman 4: Ýltımatým» fılminiń rejısseri Robert Kýn qabyldady.
Sharaǵa Almaty oblysynyń ákimi Marat Sultanǵazıev qatysty. Sonymen qatar Djekı Channyń prodıýseri Lı Chıý Va jáne «DALA EDGE» kreatıvti jáne tehnologııalyq ındýstrııalar parki, «Salem Entertainment» kompanııalarynyń basshylary arasynda memorandýmǵa qol qoıyldy.
Aımaq basshysy bul jobanyń mańyzyn erekshe atap ótti.
«Qazirgi zaman – aqyl-oı men talanttyń, ozyq tehnologııa men jańa ıdeıalardyń dáýiri. Memleket basshysy kreatıvti ekonomıkany ilgeriletý arqyly el damýynyń jańa kókjıegin ashýdy strategııalyq mindet retinde aıqyndaǵan. Biz osy baǵyttaǵy mańyzdy qadamǵa kýá bolyp otyrmyz», dedi Marat Sultanǵazıev.
Ákimniń aıtýynsha, «Dala Stage Creative Tech Park» tek ǵımarat emes, ulttyq mádenıet pen zamanaýı tehnologııany toǵystyratyn jańa ındýstrııanyń negizi. Joba halyqaralyq stýdııalarmen birlese júzege asyrylady. Bul óz kezeginde tájirıbe almasýǵa jáne kásibı mamandar daıarlaýǵa múmkindik beredi.
Ulttyq kıno jaýharlary
Jańa pavılon Qazaqstannyń kıno salasyn damytýǵa, álemdik deńgeıdegi kontent jasaýǵa jáne ınvestısııa tartýǵa jol ashady. Sondaı-aq elimizdiń túkpir-túkpirinen talantty jastardy tartatyn shyǵarmashylyq ortalyq qalyptasady.
Kınopavılon zamanaýı dekorasııalar men joǵary tehnologııalyq múmkindikterdi usynady, bul – otandyq mamandardyń halyqaralyq stýdııalarmen teń dárejede jumys isteýine jaǵdaı jasaıdy.
Almatyda dańqty kınogerlerge arnalǵan kórme ashyldy
Djekı Channyń prodıýseri Lı Chıý Va bul jobanyń júzege asýyna qýanyshty ekenin jetkizdi.
«Jarty jyl buryn biz osy jobany talqylaǵan edik, al búginde qurylys bastalyp ketti. Bul – úlken jetistik. Djekı Chan barsha qazaqstandyqtarǵa sálem joldap, jobaǵa tabys tileıdi», dedi ol.
Jobanyń jalpy aýmaǵy – 15 gektar. Ǵımarat aýdany – 3 000 sharshy metr. Qurylys 2026 jyldyń tamyz aıynda aıaqtalady dep josparlanǵan.«Dala Stage» jobasy Qazaqstanda kreatıvti ındýstrııany damytýǵa serpin beretin mańyzdy ortalyqqa aınalmaq. Bul pavılon ulttyq qundylyqtardy dáriptep qana qoımaı, elimizdiń halyqaralyq deńgeıdegi mádenı jáne ekonomıkalyq bedelin arttyrýǵa yqpal etedi.
Elimizde kınojobalardy irikteý konkýrsy bastaldy