10 shildeden bastap 12-16 jas shamasyndaǵy 60 jas sportshy men Aqtóbe, Aqmola, Qostanaı, Qaraǵandy, Pavlodar jáne Shyǵys Qazaqstan oblystarynan, sondaı-aq Almaty jáne Astana qalalarynan 7 jattyqtyrýshy lagerge kelip jetti. Segiz kún boıy áserge toly mádenı baǵdarlamalar men jattyǵýlardan balalardyń erteli-kesh qoldary bosamady deýge bolady.
Balalarǵa arnalǵan jazǵy lagerdiń uıymdastyrýshysy «Qazaqstan Respýblıkasy Shańǵy jarysynyń ulttyq federasııasy» QB balalarǵa arnap san túrli baǵdarlama ázirledi. Sportshy balalar basseınde shomylyp, volleıboldan jarysqa qatysty. Nátıjesinde, Aqmola oblysynyń komandasy birinshi oryndy qanjyǵasyna baılady. Sonymen qatar, olar atpen serýendep, ústel tennısin oınap jáne shańǵy rollerlerinde komandalyq jarysqa qatysý múmkindigin aldy. Atalmysh jarysta dostyq jeńdi.
Balalardyń qýanyshynda shek joq. Sebebi, Qazaqstanda osy tektes lager buryn-sońdy bolmaǵan edi.
— Lagerge baratynymdy bilgen joqpyn, men tek kóp jattyǵyp, bapkerlerdiń kózine túsýge tyrystym. Osylaısha, olar meniń lagerge bratynymdy aıtty. Qýanyshymdy sózben aıtyp jetkizý múmkin emes! Ol jerdiń tabıǵaty, taza aýasy, tas joldary qatty unady. Al, komandamyz óte uıymshyl boldy. Áserge toly kúnderimizben qımaı-qımaı qoshtastyq. Aldaǵy ýaqytta da osyndaı lagerler kóptep uıymdastyrylsa eken deımin, – deıdi Aqmola oblysynan kelgen 15 jasar sportshy Ksenııa Sorokına. Qazaqstan Shańǵy jarysy ulttyq federasııasynyń bas hatshysy Andreı Igorevıch Nevzorov lagerdiń Qazaqstanda shańǵy sportyn dáripteýdiń ózindik fleshmobyna aınalǵanyn aıtady.
— Bizde shańǵy jarysynyń qalyptasqan jaqsy dástúrimen qatar óz chempıondarymyz da bar. Búginde balalarǵa arnalǵan lagerdi uıymdastyrý múmkindigi týyp, ár aımaqtan jas sportshylardy shaqyramyz dep sheshtik. Olar mundaǵy ýaqyttarynyń kóp bóligin árıne, jattyǵýǵa arnaǵanymen, olardyń nazaryna mádenı jáne áleýmettik sharalar da usyndyq. Esten ketpes áser men qýanyshqa toly sátter syıladyq. Eń bastysy, balalar bir-birimen tanysyp, tipti jaqyn dostarǵa aınaldy, - deıdi Andreı Igorevıch.
Sondaı-aq, Nevzorov atalǵan lagerdiń sportty damytý ǵana emes, óskeleń urpaqqa tálim berý maqsatyn kózdegenin alǵa tartty.
—Qazirgi ýaqytta balalardyń kóbi bos ýaqyttaryn telefonǵa telmirýmen ótkizetini shyndyq. Al, lagerde olar bir-birimen jaqyn aralasyp, áńgimelesip, shúıirkelesedi. Jalpy sport lagerinde qandaı da bir ispen aınalysyp, jarystarǵa qatysqan kezde bos júrýge ýaqyttary bolmaıdy. Elimizde sportpen aınalysý sánge aınalǵan. Qazirgi ýaqytta, kimde-kim sportpen aınalyssa, ol – mádenıetti, saýatty, sypaıy ári parsatty adam degen baǵa beriledi. Alǵashqy kúnnen bastap, osy qasıetterdi jas shańǵyshylardyń boıyna sińirýge tyrystyq, - deıdi Andreı Igorevıch.
Aıta ketsek, atalǵan lager Ile Alataýy jotasynyń betkeıinen 1500 metr bıiktiktegi biregeı jerde, Talǵar qalasynda oryn tepken.