Sapar barysynda Baqytjan Saǵyntaev «Petropavl» Halyqaralyq áýejaıyn jóndeý barysymen jáne onyń tranzıttik áleýetin damytý perspektıvalarymen tanysty.
Oblys ákiminiń orynbasary A. Fedıaev áýejaı termınalynyń ǵımaraty men ushý-qoný jolaǵynyń jóndeýden ótkenin, bul áýe kemeleriniń kez kelgen túrin qabyldaýǵa múmkindik beretinin baıandady. Budan ózge, áýejaı perronyn keńeıtý jáne kirme joldy jóndeý josparlanǵan. Petropavl áýejaıyn jóndeý Reseı Federasııasynyń Qorǵan, Túmen jáne Omby oblystarymen shekaralas Soltústik Qazaqstan oblysynyń tranzıttik áleýetin tıimdirek paıdalanýǵa múmkindik beredi.
Jumys sapary kezinde Baqytjan Saǵyntaev «Nurly jer» baǵdarlamasy aıasyndaǵy turǵyn úı qurylysynyń barysymen, Petropavldyń «Nurly jol» baǵdarlamasy aıasyndaǵy áleýmettik jáne ınfraqurylymdyq nysandarymen tanysady dep kózdelgen. О́ńirdiń ónerkásip kásiporyndary men medısına mekemelerin, aýyl sharýashylyǵy keshenderin aralaý josparda bar.
QR Premer-Mınıstri Baqytjan Saǵyntaev AО́K damytý memlekettik baǵdarlamasyn iske asyrý boıynsha Aqmola, Soltústik Qazaqstan, Qostanaı, Qaraǵandy, Pavlodar oblystarynyń ákimdikteri men aýyl sharýashylyǵy qurylymdarynyń basshylarynyń qatysýymen respýblıkalyq keńes ótkizedi dep kútilýde. «Atameken» UKP óńirlik keńesiniń múshelerimen kezdesýde shaǵyn jáne orta bıznesti damytý, kásipkerlik ortasyn qaıta retteý, oblysta ónimdi jumyspen qamtý jáne jappaı kásipkerlikti damytý baǵdarlamasyn iske asyrý máseleleri talqylanady.
Sondaı-aq, jumys sapary aıasynda QR Premer-Mınıstri Baqytjan Saǵyntaevtyń tóraǵalyǵymen tehnologııalyq jańǵyrtý, sıfrlandyrý jáne Indýstrııa 4.0 elementterin engizý, IIDMB-2 iske asyrý jáne ınvestısııalar tartý máselelerin talqylaý boıynsha jumys keńesin ótkizý josparlanǵan. Baqytjan Saǵyntaev bıyl kóktemde sý deńgeıiniń kóterilýinen zalal tartqan Zarechnyı kentinde sý tasqyndaryn eskertý men olardyń saldarlaryn joıý boıynsha kóshpeli keńes ótkizedi dep kózdelip otyr.