Jeńil atletıkadan Azııa chempıonaty 6-9 shilde aralyǵynda Úndistannyń Bhýbaneshvar qalasynda ótken bolatyn. Oǵan saryqurlyqtyń 43 elinen 800-den astam sportshy qatysqan. Qazaqstan ulttyq quramasy jalpy komandalyq esepte tórt altyn, eki kúmis, eki qola medal ıelenip, Úndistan men Qytaıdan keıingi úshinshi orynǵa ıe boldy.
«Elimizdiń namysyn Azııa chempıonatynda abyroımen qorǵap, júldeli orynǵa ıe bolǵan barlyq sportshylarǵa federasııa basshylyǵynyń atynan alǵys bildiremin. Sportshylarymyz Azııa birinshiliginen jalpy sany segiz medalmen oraldy. Ol biz úshin úlken jetistik. «Sport padıshasy» atanǵan sporttyń bul túrine Elbasymyz erekshe kóńil bólip, árdaıym qoldaý kórsetip keledi. Aldaǵy jarystarda da sportshylarymyz jaqsy nátıjege qol jetkizedi dep oılaımyn jáne bul marapatymyzdyń sońy bolmas degen úmittemin», deıdi federasııa prezıdenti Ádilbek Jaqsybekov.
100 jáne 200 metrge júgirýden áıelder arasynda eki altynǵa qol jetkizgen Vıktorııa Zıabkına men úsh qarǵyp sekirý saıysynan Azııa chempıony atanǵan Marııa Ovchınnıkovaǵa qarjylaı bes myń AQSh dollary, odan bólek quramynda Svetlana Golendova, Rıma Kashafýtdınova, Vıktorııa Zıabkına jáne Olga Safronova bar 4h100 metrge estafetalyq júgirýden áıelder quramasynda top jarǵan árbir atletshi qyzǵa 400 myń teńge kóleminde syıaqy berildi.
Sonymen qatar, 100 metrde kúmis, 200 metrde qola medalǵa ıe bolǵan Olga Safronova 4,500, úsh qarǵyp sekirýden kúmis júldeger Irına Ektova 3 myń jáne erler arasynan ıadro laqtyrýdan qola medaldi ıelengen Ivan Ivanov 1,500 AQSh dollarymen marapattaldy.
Marapattaý rásiminde Qazaqstan respýblıkasynyń Mádenıet jáne sport mınıstri Arystanbek Muhamedıuly ulttyq quramanyń bapkerler quramyn alǵys aıtyp, Prezıdenttiń jeńil atletıka sportyna basa nazar aýdaryp jatqanyn aıtty. «Eń birinshi bapkerler quramynyń tabandy eńbegi men jetken jetistikteri úshin alǵysymdy bildirgim keledi. Elbasy «Sport jáne dene shynyqtyrý» zańyna qol qoıǵan kezde buqaralyq sport pen jeńil atletıkaǵa kóńil bólýdi birinshi orynǵa qoıý kerek dep aıtqan bolatyn».
Úndistanda ótken jeńil atletıkadan Azııa chempıonatyna alǵash ret qatysyp, úsh qarǵyp sekirýden chempıon atanǵan 18 jastaǵy qaraǵandylyq sportshy Marııa Ovchınnıkovadan mamandar jas sportshynyń bolashaǵynan úlken úmit kútip otyr. Sondaı-aq, Marııa Londonda ótetin álem chempıonatyna joldama alǵan bolatyn.
– Azııa chempıonatynda básekelestik óte joǵary boldy. Degenmen, áriptesim Irına Ektova ekeýmiz altyn men kúmis júldeni bólip alǵanymyzǵa qýanyshtymyn. Alda Londonda ótetin álem chempıonaty bar. Myqtylardyń bas qosatyn dodada aıanyp qalmaımyn, - deıdi Marııa Ovchınnıkova.
Marapattaý rásiminiń sońynda Ádilbek Jaqsybekov barlyq sportshy men bapkerlerge aldaǵy jarystarǵa sáttilik tiledi. Aldaǵy ýaqytta jeńil atletterimiz Londonda ótetin álem chempıonatyna, Taıpeıde ótetin Jazǵy Ýnıversıada men Ashhabadta ótetin jabyq alańdaǵy Azııa chempıonatyna qatysady.
Álı BITО́RE
«Egemen Qazaqstan»