Pavlodar munaı-hımııa zaýytyn jańǵyrtý Indýstrııalyq-ınnovasııalyq damytý memlekettik baǵdarlamasy boıynsha júrgizilip jatyr jáne basqarý júıesin avtomattandyrýdan, energııa únemdeıtin jáne ekologııalyq taza tehnologııalardy engizýden turady, bul shıki munaıdy qaıta óńdeý boıynsha ónimdilikti arttyrýǵa múmkindik beredi.
«Pavlodar munaı-hımııa zaýyty» JShS bas dırektory Shýhrat Danbaı jańǵyrtýdy aıaqtaǵannan keıin joǵary oktandy benzın óndirisi 297 myń tonnaǵa ulǵaıatynyn, sondaı-aq halyqaralyq Jet A1 standartty avıaotyn óndirisi qamtamasyz etiletinin baıandady.
PMHZ jańǵyrtý jobasy boıynsha 12 tehnologııalyq qondyrǵy men 16 jalpy zaýyttyq sharýashylyq nysany salynyp jáne jóndelip jatyr. Jańǵyrtýdan keıin aqshyl munaı ónimderi óndirisi jylyna 333 myń tonnaǵa artady.
Zaýytty jańǵyrtý aıasynda sondaı-aq qoldanystaǵy qondyrǵylardy jóndeý júrgizilýde, bul aǵymdaǵy jyldyń sońynda K4, K5 standartty dızel otynyn jáne avıasııalyq otyn óndirýdi bastaýǵa múmkindik beredi.
Jalpy, PMHZ jańǵyrtý tutynýshylardy sapaly munaı ónimderimen qamtamasyz etýge jáne jańa tehnologııalar engizý, basqarýdy avtomattandyrýdy arttyrý esebinen qorshaǵan ortaǵa júktemeni azaıtýǵa múmkindik beredi.