Spıkerdiń sózinshe, ótinishterdi qaǵaz túrinde jáne Digital Baiterek ınternet portaly arqyly onlaın rejimde 2 qazanǵa deıin joldaýǵa bolady. «Biz bıznes prosesterdi qaıta ınjenerleýdi ótkizdik jáne granttardy berý sharttaryn jaqsarttyq. Eger buryndary bıznes úshin tartymsyz bolyp tabylatyn jáne sońǵy ónimdi shyǵarýdy qarastyrmaıtyn granttyń 9 túri qarastyrylǵan bolsa, al qazirgi tańda olardy qarjylandyrýdy shekteý aıtarlyqtaı azaıyp, 3 túrge toptastyryldy», dep atap ótti «TDUA» AQ basshysy Marat Omarov.
Sonymen qatar, Marat Omarov 3 topqa bólingen grant túrleriniń árqaısysyna toqtalyp ótti. Ol jumys istep turǵan kásiporyndardyń tehnologııalyq damýyna ınnovasııalyq granttardy berýdiń jańa erejelerine sáıkes, granttyń somasy lısenzııalyq shart boıynsha dáleldengen shyǵyndardyń 70 paıyzyn nemese jabdyqtardy satyp alý úshin dáleldengen shyǵyndardyń 50 paıyzyn quraıtynyn, al aqshalaı túrde 400 mln teńge bolatynyn baıandady.
«Salalardyń tehnologııalyq damýyna granttyń kólemi, lısenzııalyq shart boıynsha dáleldengen shyǵyndardyń 70 paıyzyna deıin jáne jabdyqtardy satyp alý úshin dáleldengen shyǵyndardyń 50 paıyzyna deıin jáne tehnologııalyq quzyretti arttyrý boıynsha dáleldengen shyǵyndarǵa ketken shyǵystardyń 85 paıyzyn quraıdy, aqshalaı túrde 500 mln teńgege deıin. Al tehnologııalardy kommersııalaý grantynyń kólemi, dáleldengen shyǵyndardyń 50 paıyzyn quraıdy, aqshalaı túrde 200 mln teńge bolady», dedi «TDUA» AQ basshysy. Aıta ketetin taǵy bir jaıt, grant túrleriniń árqaısysy boıynsha ıgerý merzimi 36 aıdan aspaýǵa tıis.
Raýan QAIDAR, «Egemen Qazaqstan»