Merekelik is-sharada Qazaqstan men Gvıneıanyń týlary kóterilip, ánurandary shyrqaldy. Jıynda Din isteri jáne azamattyq qoǵam vıse-mınıstri Abzal Núkenov alǵysóz aldy.
– Aldymen, Qazaq eli atynan, sondaı-aq, óz atymnan Gvıneıa Respýblıkasynyń delegasııasyna jáne elordamyzǵa kelgen sheteldik qonaqtarǵa qosh keldińizder degim keledi. EKSPO-2017 – elimiz úshin mańyzdy oqıǵa. Bıyl qos memleket arasyndaǵy qarym-qatynastyń ornaǵanyna 25 jyl tolyp otyr. Gvıneıa Qazaqstannyń Batys Afrıkadaǵy mańyzdy áriptesi bolyp esepteledi, – dedi Abzal Núkenuly.
EKSPO kórmesi jasyl energetıkany nasıhattaýmen qatar, ınvestorlarǵa da yńǵaıly jaǵdaı týǵyzyp otyr. Batys Afrıkada ornalasqan bul el mıneraldy, gıdroenergetıkalyq jáne aýyl sharýashylyǵy resýrstaryna óte baı. Sonymen qatar, almaz, altyn, ýran, boksıt sekildi zattar boıynsha álemde aldyńǵy qatardy ıelenip tur. Bul memleket búginde balamaly qýat kózine tolyǵymen qoldaý bildirip otyr. Osy baǵytty damytý úshin energetıkasy damyǵan memleketterdiń tájirıbesin qoldanysqa engizýdi josparǵa alyp otyr.
Málimetter boıynsha bul memlekette qaladan tysqary ornalasqan keıbir eldi mekenderde áli kúnge deıin jaryq júıesi qoıylmaǵan. Halqynyń 70 paıyzy aýyl sharýashylyǵy salasynda qyzmet etedi.
– Aldaǵy úsh jylda, ıaǵnı 2020 jylǵa deıin Gvıneıa Respýblıkasynyń 65 paıyzyn elektr energııasymen qamtamasyz etýdi maqsat etip otyrmyz. Oǵan jaǵdaıymyz tolyq jetedi, qajetti resýrs ta bar. Ásirese, sý elektr stansalaryn kóbirek salýǵa múmkindik bar. Mine, qazirgi ýaqytta osy salany damytsaq dep josparlap otyrmyz. Alaıda, bul maqsatymyzdy júzege asyrý úshin qarjy qajet, ınvestorlardy barynsha tartýymyz kerek. Qazir arnaıy kelissózder júrgizip jatyrmyz. EKSPO kórmesiniń bul rette úlken septigi tıetinine senimim mol, – dedi Gvıneıa Saýda mınıstrliginiń shtab basshysy Bala Dopavogı.
Shara sońynda arnaıy mýzykanttar toby EKSPO aýmaǵyn dýmandatyp ótip, Afrıka plaza pavılonyna kirdi.
Aıan ÁBDÝÁLI,
«Egemen Qazaqstan»