Solaı, Dáýrenmen jolyqtyq. «Jylqy kisineskenshe, jaqsy adam sóıleskenshe» degen ǵoı. Bolashaq keıipkerimizben áp-sátte áńgimemiz jarasyp júre berdi.
2009 jyly ásker qataryna shaqyrylyp, Otan aldyndaǵy boryshyn Ulttyq ulannyń Shymkent qalasyndaǵy 6506 áskerı bóliminde ótegen Dáýren, keıin sol áskerı qurylymǵa «tastaı batyp, sýdaı sińgen eken». Iаǵnı, áskerden soń qyzmetin kelisimshart negizinde jalǵastyrǵan. Sodan beri elim degen azamattyń sanaly ǵumyry el qorǵaý isimen sabaqtasa órbip keledi. Osy ýaqytqa deıin Dáýren Ulttyq ulannyń kishi býyn komandırlerine tıis qandaı laýazymdy atqarmady deseńizshi. Qazir «Ońtústik» óńirlik qolbasshylyǵynyń arnaıy jáne áskerı tasymal bóliminde qyzmet etedi. Jaqynda alǵashqy ofıserlik shenin alýǵa umtylyp otyrǵan jaıy bar. Ol qandaı laýazymdarda qyzmet atqarmasyn, eń áýeli qyńq dep qıyndyqqa moıymaı, Otan úshin adal eńbek etip keledi.
Dáýren osy kúnge deıin Otan qorǵaý jolyndaǵy qyzmetin aıryqsha yntamen atqaryp, adalynan abyroı bıigine kóterilgen azamattar sanatynda. Onyń ashyqtyǵyn, kópshilikke kómek qolyn soza biletin jarqyndyǵyn, óz qyzmetin jetik biletin biliktiligin áriptesteri qurmet tutady. Úzdik qyzmeti úshin birneshe ret joǵary basshylyqtyń marapatyna ıe bolǵan.
Temir jol qyzmeti salasynyń ishinde arnaıy jáne áskerı tasymaldaý isiniń kóteretin júgi qashanda qomaqty. Bólim basshylyǵynyń aıtýynsha, serjant Dáýren Omarov óz isin jetik biletin maman.
«Qyzmetime keler bolsaq, bizdiń mindet tikeleı temir jolmen baılanysty. Bizdiń elimiz ózderińizge belgili, aınalasynda teńiz joldary joq, qurlyqishilik tasymalǵa ıe el. Sondyqtan da búkil eldegi tasymal negizinen temir jol jáne avtojoldar arqyly júzege asyrylady, onyń ishinde temir joldyń júk jetkizý úlesi 100 paıyzdyń 73 paıyzyna deıin.
Biz osy kólik túrinde arnaıy jáne áskerı tasymaldy úılestiremiz. Bizdiń qyzmetke elimizdegi kez kelgen mekeme arnaıy tapsyrys berý arqyly júginedi. Máselen, shekara qyzmeti ózderiniń qurylymdyq bólimshelerine ártúrli júkterdi jetkizýge, al Ulttyq bank valıýta tasymalyn uıymdastyrýǵa tapsyrystar berip jatady. Kórip otyrǵandaryńyzdaı, bizdiń júk tasymalyna artylǵan jaýapkershilik zor. Ol birinshiden, sol tasylatyn júktiń mańyzdylyǵyna, sonymen birge onyń memleket úshin strategııalyq mánine baılanysty. Odan basqa, adamdardy temir jol arqyly tıisti jerge jetkizý, áskerı tehnıka, Qarýly Kúshterimizge qatysty kez kelgen tasymal isin biz atqaramyz. 2009 jylǵa deıin biz Ishki ister mınıstrliginiń quramynda boldyq. Sol jyldan bastap bizdiń qyzmet búgingi Ulttyq ulan quramyna engizildi. Bul jumystyń tıimdiligi úshin vedomstvoaralyq júrgizilgen reforma nátıjesi bolyp tabylady.
Arnaıy jáne áskerı temir jol júk tasymaly qyzmetindegi asa jaýapty is bul – qaýipsizdik sharalaryna árdaıym bekem bolý. Ol degenimiz, tasymaldanýshy júkterdi, paıdalaný tehnıkany qaýipsizdik talaptaryna saı jabdyqtaý, mamandarǵa qaýipsizdik erejelerin udaıy oqytyp-úıretý. Qazirgi tańda bul máseleler «Ońtústik» óńirlik qolbasshylyǵynyń tasymalǵa qatysty bólimshelerinde tolyqtaı sheshimin tapqan. Jyl saıyn mamandardy arnaıy kýrstarda oqytyp, biliktiligin jetildirip otyramyz. Munyń syrtynda «Qazaqstan temir joly» AQ mamandary qajetti ádistemelik kómekterin udaıy kórsetip turady», deıdi ol qyzmeti jaıly.
Qoryta aıtqanda, sózi men isi bir arnada qabysqan jandardy sertke berik azamat deımiz. Olar árqashanda bir sózdi keledi. Qınalys tanytpaı, el úshin júgine qyzmet atqardy. Halqymyz aıtatyn «Erdiń isi – kelis» degen de osy. Táýelsiz eldiń tuǵyryn tiktep, kemel keleshekke nyq qadam basýyna da osyndaı nar azamattardyń aq-adal eńbegi birden-bir sebepshi ekeni anyq. Olardyń qatarynan Dáýrenniń de oryn alary ras.
Arman ÁÝBÁKIROV, jýrnalıst
Almaty