Aýdandaǵy Baraq batyr atyndaǵy sport mektebine kelgen batyr tulǵaly, kózderinen ot ushqyndaǵan Aıbolat aýzyn ashsa júregi kórinetin, aqkóńil azamat eken.
– 1989 jyldyń 21 maýsymy meniń taǵdyrymdy ózgertip jiberdi, – dep eske aldy sol bir oqıǵany batyr inimiz. – Marat degen dosymnyń kóligine otyryp, qasymda taǵy úsh-tórt jerlesim bar, Jolnusqaýdan Aqsýatqa qaraı kele jatqanbyz. Kólikti basqaryp otyrǵan dosym abaılamaı qalsa kerek, oqysta aýdarylyp qaldyq. Jyldamdyq qalypty jaǵdaıda bolatyn. Julynǵa kelgen qatty zaqymnan aqyry múgedek bolyp qaldym. Abyroı bolǵanda janymdaǵy serikterim din aman. Taǵdyrdyń jazýyna ne aıtamyn, munyń aldynda Kúrshimdegi kásiptik-tehnıkalyq ýchılısheniń traktorshy bólimin aıaqtap, osy mamandyq boıynsha jumys istep júrgenmin. Syn sátte aýyldastarym, týystarym meni qoldady. Sonan soń ózim de qarap otyra bermeı kásipkerlikpen shuǵyldana bastadym. Bul ermegim ózime unady. Bala kezimnen sportqa áýes edim, túrli jattyǵýlardy úıde jasaıtynmyn. Aqyry, osydan eki jyl buryn qaıyrymdy azamat Qaırat Toqanulynyń túrtki bolýymen qol kúresimen aınalysa bastadym. Nátıje jaman emes, – dep arbasynda otyryp jymıdy jigerli jigit.
Kesek deneli, bulshyq etteri bult-bult oınaǵan Aıbolat ózi jaıly aıtqanda áńgimege sarań bolyp shyqty. Esesine, Aıbolatty qol kúresine qyzyqtyrǵan Qaırat Toqanuly ol týraly yqylaspen pikir bildirdi.
– Eki jyl – qol kúresi úshin uzaq ýaqyt emes. Alaıda, Aıekeń osy aralyqta eki ret oblys, eki ret el chempıonattarynda top jardy. Aýdan ortalyǵynda ótken jarystarda eshkimge des bermeı keledi. 2015 jyly Reseıdiń Sochı qalasynda Paralımpııa oıyndary ótip, oǵan Aıbolat ta qatysty. 100 kılodan asatyn aýyr salmaq boıynsha qola medaldy ıelendi. Aıbolattyń endigi armany – álem chempıony ataný. Jattyǵýlar jalǵasa berse, oǵan qol jetkizýge bolady. Kúrshimdegi balyq zaýytynyń basshysy Nurlan Qasymhanov, isker azamattar Erjan Sqaqov, Janarbek Bilimbaev degen jany jomart azamattarǵa myń alǵys. Alǵashqysy bir mıllıon teńge, oblystyq sport basqarmasy 500 myń teńge demeýshilik kómek kórsetti. Attary atalǵan eki azamat ta qomaqty kómekten aıanbady. Aıbolattyń qolarbada otyryp-aq, aýdandy bylaı qoıyp, oblys namysyn qorǵap, joǵary nátıjelerge jetýi –múmkindigi shekteýli basqa jandarǵa da úlgi boldy. Qazirdiń ózinde Erik, Pavel degen jigitter de qol kúresimen shuǵyldana bastady, – deıdi Qaırat Toqanuly.
Kúrshimdegi balalar jáne jasóspirimder sport mektebi dırektorynyń oqý isi jónindegi orynbasary Aıgúl Shepenova aýdannyń túgelge jýyq aýyldarynda túrli fılıaldardyń jumys istep turǵanyn, olarda 902 balanyń boks, qazaq kúresi, erkin kúres, shaıbaly hokkeı, fýtbol, voleıbol sııaqty sport túrlerimen shuǵyldanatynyn, túrli deńgeıdegi jarystarda shákirtteriniń táýir nátıjege qol jetkizip júrgenderin maqtanyshpen aıtty. Aýdan ákimi Seısenǵazy Chýkaev sport mektebine qamqorlyq jasap turady eken.
Taǵy bir aıta ketetin jaıt, Baraq batyr sport keshenine kelgenimizde, múmkindigi shekteýli jandarǵa arnalǵan sport zaldarynyń qajetti quraldarmen jabdyqtalǵanyn kórdik. Munda senbi, jeksenbi kúnderi de jattyǵa berýge bolady. Demek, sportqa kóńil bólingen jerde tabystyń da mindetti túrde bolatyny sózsiz.
Ońdasyn ELÝBAI, jýrnalıst
Shyǵys Qazaqstan oblysy, Kúrshim aýdany