Soltústik Qazaqstan oblysy Astanadaǵy mádenıet kúnderi aıasynda Ulttyq mýzeıde kórme uıymdastyratyn birinshi óńir bolady. «Kórmede meshitter men shirkeýdiń metrıkalyq kitaptary, Qazaq handyǵynyń tarıhy men 18 ǵasyrdaǵy shetel arhıvteriniń qujattary men qujat kóshirmeleri, «Alash» partııasy men «Alash Orda» qyzmetine qatysty biregeı qujattar usynylady», - dedi oblystyq arhıv dırektory Sáýle Malıkova. Kórmege oblystyń kıeli jerleriniń kartasy, Memleket basshysy Nursultan Nazarbaevtyń Soltústik Qazaqstan oblysyna jasaǵan saparlarynyń fotoqujattary qoıylady.
«Bizde Maǵjan Jumabaevtyń qoljazbasy bar. Bul qujat buryn qupııa saqtalyp kelgen. Alaıda, odan «asa qupııa» tańbasy alynyp tastaldy. Qujat 1922 jyldyń 20 tamyzy kúni oblysta asharshylyq kezinde jazylǵan», - dep túsindirdi Sáýle Malıkova.
«Qazaqstannyń jańa tarıhı belesi» kórmesi 24-26 tamyz aralyǵynda Qazaqstan Respýblıkasy Ulttyq arhıviniń kórme zalynda saǵat 11.00-den 18.00-ge deıin ótedi.