Atyraýda aı-kúni jetken ár besinshi áıel balasyn kesý tiligi arqyly ómirge ákeledi. Tipti qazir tolǵaqtyń azabyn aýyrsynyp, ota jasatýdy suraıtyn analar qatary kóbeıdi. «Áıel densaýlyǵy úshin kesý tiliginiń kesiri kóp» deıdi dárigerler. О́tken jyly óńirde bes ana ólimi tirkeldi. Al bıylǵy 5 shildede jas ana kesar tiligi arqyly egiz balasyn dúnıege ákelip, jeti saǵattan soń kóz jumdy. Ol buǵan deıin de úsh balasyn «pyshaqqa túsip» bosanǵan. Oblystyq ishki ister departamenti baspasóz qyzmetiniń habarlaýynsha, qazir ana ólimine baılanysty Qylmystyq kodekstiń 317-baby 3-bóligimen sotqa deıingi tergeý-tekserý júrip jatyr. Qaıǵyly jaǵdaı dárigerlerdiń salǵyrttyǵynan ba, álde basqa sebep boldy ma, ony tekserý anyqtaıdy. Oblystyq densaýlyq saqtaý basqarmasynyń basshysy Mánshúk Aımurzıeva qaýipti júktilik pen ana men bala ólimi kórsetkishi joǵary bolyp turǵanyn aıtady. Jyl basynan beri 7818 ana ómirge sábı ákelgen. Sońǵy jyldary ýaqytyna jetpeı bosaný derekteri kóbeıip tur. Bıyldyń ózinde 492 bala shala týǵan. Medısına damyp, adamdardyń densaýlyq saqtaý týraly aqparaty molaıǵanymen, áli kúnge deıin dárigerge kórinýdi keıinge qaldyra beretinde azaıar emes. «Júktilik kezinde medısınalyq tekserýden ótpeıtinder bar. Naqty málimet boıynsha, elý júkti áıeldiń esh jerde tirkelmegeni belgili boldy», deıdi densaýlyq saqtaý basqarmasynyń basshysy. Oblys ákimi Nurlan Noǵaevtyń tóraǵalyǵymen ótken úılestirý keńesinde osy máselege qatysty taǵy bir jaıt aıtyldy. Qazir el dárigerden buryn balgerler men táýipterge kóbirek senedi. Mysaly, Mahambet aýdanynyń turǵyny – júkti áıel qalqansha bezi aýyratynyn bile tura, emhanaǵa esepke turmaǵan. Izdep barǵan dárigerlerge de kórinýden qashypty. Týystarynan belgili bolǵandaı, ol Qulsary qalasyndaǵy bir emshige qaralǵan jáne sonyń ǵana aıtqandaryn istep, dári qabyldamaǵan. Sonyń saldarynan merziminen buryn bosanyp, ómirge shala náreste ákeldi. Dárigerler balanyń jaǵdaıy nashar ekenin aıtady. О́kinishtisi sol, mundaı derekter el arasynda az kezdespeıdi. Buǵan deıin de táýipke kórinemin dep ajal qushqan Mahambet aýdanynyń turǵyny týraly aıtylǵan bolatyn. Osy jaıtty qaperge alǵan aımaq basshysy quzyrly organdarǵa lısenzııasy joq baqsy-balgerlerge shara qoldaný qajettigin tapsyrdy. Baqytgúl BABASh, «Egemen Qazaqstan»
ATYRAÝ