Aýyr atletıka
Taıbeıde bastalǵan stýdentter arasyndaǵy Jazǵy ýnıversıadanyń birinshi jarys kúninde qazaqstandyq ziltemirshi Arleı Chonteı Qazaqstan qorjynyna alǵashqy medaldy saldy. Ol erler arasynda 56 kılo salmaqta synǵa túsip, qola júldeni jeńip aldy.
Arleı Chonteı qossaıys boıynsha 258 kılony eńserdi (115-143). Al Chonteıden ziltemirdi 36 kılo aýyr kótergen Soltústik Koreıa sportshysy Chol Iýn Om Ýnıversıada chempıony atandy. Kúmis júlde 263 kılo (119+144) kótergen domınıkandyq Lýıs Alberto Garsııaǵa buıyrdy.
Aıta keteıik, Jazǵy ýnıversıada 30 tamyzǵa deıin jalǵasady. Bul jarysta qazaqstandyq sportshylar jeńil atletıka, júzý, boks, kúres jáne basqa da sport túrleri boıynsha synǵa túsýde.
Jeńil atletıka
Anglııanyń Bırmıngem qalasynda jeńil atletıkadan «Gaýhar lıganyń» irikteý kezeńi aıaqtaldy. Sońǵy kezeńde Olga Rypakova 14,19 metrge sekirip, úshinshi oryn ıelendi. Al bas júlde 14,51 metrge sekirgen kolýmbııalyq Katrın Ibargýenge buıyrdy. Ekinshi orynǵa Iаmaıka sportshysy Kımberlı Ýılıams (14,44) turaqtady.
Osylaısha, 2017 jylǵy «Gaýhar lıga» týrnıriniń irikteý kezeńi aıaqtaldy. Endi alda sportshylardy fınaldyq kezeń kútip tur. Týrnır Shveısarııanyń Sıýrıh qalasynda ótedi.
Tennıs
Erler arasyndaǵy halyqaralyq tennıs qaýymdastyǵy (ATR) sportshylardyń jańartylǵan reıtıngin jarııalady. Bul tizimde qazaqstandyq tennısshiler Mıhaıl Kýkýshkın men Aleksandr Býblık úzdik júzdikke birtaban jaqyndady. Reıtıngte Kýkýshkın 102-shi orynǵa, al Býblık 103-shi orynǵa ornalasqan. Al 7 645 upaı jınaǵan ıspandyq Rafael Nadal álemniń birinshi raketkasy atandy.
Sonymen qatar, áıelder tennıs qaýymdastyǵy da (WTA) reıtıngterin jańartty. Qazaqstannyń birinshi raketkasy Iýlııa Pýtınseva bir satyǵa joǵary kóterilip, TOP-50 úzdik tennısshilerdiń qataryna endi. Iаroslava Shvedova óziniń 81-shi ornyn saqtap qaldy. Zarına Dııas bir satyǵa tómen túsip, 108-shi orynǵa turaqtady. Qyzdar arasyndaǵy reıtıngte cheh qyzy Karolına Plıshkova 6 390 upaımen kósh bastap tur.
Ázirlegen Álı BITО́RE,
«Egemen Qazaqstan»