Alataý aýdanyndaǵy TES-2 mańynda salynatyn zaýyt qurylysyn «Green Recycle» JShS júzege asyrmaq. Jańa zaýyttyń alǵashqy kirpishterin qalaý rásimine Almaty qalasy ákiminiń orynbasary Sultanbek Mákejanov qatysty.
2018 jyly paıdalanýǵa beriletin, jylyna 550 myń tonnalyq qýatpen jumys isteı alatyn zaýyttyń qaldyqtar óńdeýdegi óndiristik qýaty Almaty qalasynyń qajettiligin tolyq óteýge múmkindik beredi dep josparlanyp otyr. Joba Kásipkerlikti qoldaý kartasy men «Bıznestiń jol kartasy 2020» baǵdarlamasynyń negizinde júzege asyrylmaq.
«Green Recycle» JShS dırektory Dmıtrıı Danılchenkonyń aıtýynsha, suryptaý barysynda qaıta paıdalanýǵa jaramdy paıdaly quramdar iriktelip alynyp, zııandy zattar men bıoydyraǵysh materıaldar polıgon aýmaǵynda kómiletin bolady.
Áleýmettik mańyzy zor joba ınvestısııa kólemi 5,3 mlrd teńgeni quraıtyn jeke qarjy esebinen iske aspaq. Aldyn ala esep boıynsha, qoqys suryptaý keshenin salýǵa ketken shyǵyn 2025 jylǵa qaraı tolyq ótelip, memleket bıýdjetine jyl saıyn 500 mln-nan astam teńge kóleminde aqsha aýdarylyp otyrmaq. Sondaı-aq, atalmysh joba 600 jańa jumys ornyn ashýǵa múmkindik bermek.
«Almaty qalasynda 1,5 myńnan astam ónerkásiptik kásiporynnyń jumys isteıtinin eskersek, atalmysh zaýyt qurylysynyń bastalýy – Almatydaǵy ónerkásiptik jáne kommýnaldyq qaldyqtardy basqarýǵa qatysty alǵashqy jobanyń júzege asa bastaǵanyn kórsetetin mańyzdy oqıǵa desek te bolady», – dep atap ótti Almaty qalasy kásipkerlik jáne ındýstrıaldy-ınnovasııalyq damý basqarmasynyń basshysy Almas Mádıev.
Mıra BAIBEK,
«Egemen Qazaqstan»
ALMATY