Jyl basynan beri Astana qalasynyń mamandandyrylǵan balalar úıiniń 44 tárbıelenýshisi otbasyna oraldy, dep málimdedi medıa ortalyqtyń tilshisine bergen suhbatynda mekeme dırektory Sáýle Kenjetaeva.
«Jyl basynan beri bizdiń mekemege 44 bala qabyldandy. Sonymen birge 48 bala ketti. Onyń 4 múmkindigi shekteýli bala, olardy qalalyq psıho-nevrologııalyq mekemege aýystyrdyq. Al qalǵan balalardyń barlyǵy úılerine qaıtty. Iаǵnı óziniń bıologııalyq ata-analary men týǵan-týystaryna jáne asyrap alýshy azamattarǵa tapsyryldy. Biz ol úshin qýanyshtymyz», - dedi Mamandandyrylǵan balalar úıiniń dırektory Sáýle Kenjetaeva.
Onyń aıtýynsha, mekemedegi balalar úsh baǵytqa bólinedi. Olar ata-analary týa salysymen bas tartqandar, múmkindigi shekteýli ári erekshe kútimdi qajet etetin balalar. Sondaı-aq ata-analary turmystyq jaǵdaıyna baılanysty ýaqytsha tapsyrǵan krızıstik bólimniń balalary.