Ortalyq kommýnıkasııalar qyzmeti alańynda brıfıng ótkizgen «Bilim Media Group» JShS kompanııasynyń negizin qalaýshy jáne basshysy Raýan Kenjehanuly Memleket basshysynyń tapsyrmasyna oraı ázirshe 20-ǵa jýyq oqýlyq aýdarylyp jatqanyn atap ótti. «Aýdarma – kúrdeli ári jaýapty jumys. Joǵary oqý oryndarynyń stýdentterine arnalǵan oqýlyqtar qazaq tiline sapaly ári túsinikti aýdarylýy kerek. Sondyqtan osy iske qyzyǵýshylyq tanytqan aýdarmashylardy, ustazdardy, ádebı redaktorlar men ǵylymı sarapshylardy arnaıy jobaǵa belsene qatysýǵa shaqyramyz. 23 tamyz kúni Almatyda qazirgi aýdarma isiniń teorııasy men praktıkasyna arnalǵan alqaly jıyn ótkizemiz. Jobaǵa janashyrlyq bildirgen qaýymdy konferensııaǵa qatysýǵa shaqyramyz. Olardyń usynys-pikirleri biz úshin mańyzdy», deıdi R.Kenjehanuly.
Onyń aıtýynsha, búginde alǵashqy oqýlyqtardy jazýǵa 90-ǵa jýyq maman tartylypty. Olardyń deni óz salasyn jetik meńgergen ýnıversıtet oqytýshylary eken.
Jalpy kitaptar, Prezıdent atap ótkendeı, tarıh, saıasattaný, áleýmettaný, fılosofııa, psıhologııa, mádenıettaný jáne fılologııa ǵylymdary baǵytynda jaryq kórmek. Bul oqýlyqtardyń basym kópshiligi buryn-sońdy qazaq tiline, tipti orysshaǵa aýdarylmaǵan jańa basylymdar. Atap aıtqanda, Gregorı Menkıýdiń «Ekonomıks», Djordj Rıtserdiń «Qazirgi áleýmettaný teorııasy», Ellıot Aronsonnyń «Áleýmettik psıhologııaǵa kirispe», Remı Hestiń fılosofııaǵa arnalǵan kitaptary, taǵy basqalar bar.
Qazaq tilinde sóıleıtin kitaptarǵa qoıylatyn talap ta qatal. Árbir kitapqa jeke jumys komıssııasy qurylǵan. Oqýlyqtar ómirsheńdigin dáleldegen, qazirgi kúni álemniń bedeldi oqý oryndarynyń pedagogıkalyq tájirıbesinde keńinen paıdalanylyp kele jatqan, ábden súzgiden ótip, birneshe márte baspadan shyǵarylǵan bolýy tıis. Sondaı-aq, belgili bir pánniń mazmuny men mánin ashatyn, sol ǵylymnyń ıdeıa- lary men tujyrymdamalaryn dál sıpattaıtyn ózekti oqýlyq bolǵany lázim.
Buıyrtsa, rýhanı jańǵyrý aıasyndaǵy «Qazaq tilindegi 100 jańa oqýlyq. Jańa gýmanıtarlyq bilim» jobasyndaǵy oqýlyqtardyń alǵashqy legi 2018-2019 oqý jylynda stýdentterdiń qolyna tıip, ýnıversıtetter osy kitaptarmen mamandar daıarlaı bastaıdy.
Al qazaq tilindegi oqýlyqtar jobasymen tanysqysy keletinder kitap.kz saıtyna kirip, usynys-pikirin qaldyrýǵa bolady.
Qymbat TOQTAMURAT