24 tamyz kúni tańǵy saǵat 8.40. shamasynda Oral qalasynda Shaǵan ózeninen óter kópirge jaqyn jerde №5 jáne №7 avtobýstar soqtyǵysyp qalǵan. Aldyn ala málimetter boıynsha, №7 avtobýstyń 24 jasar júrgizýshisi joǵary jyldamdyqpen júrip, rólge ıe bola almaı, kópir aýzynda kepteliste turǵan №5 avtobýstyń artynan soqqan. Tańerteńgi ýaqyt bolǵandyqtan eki avtobýsta da jolaýshy tola bolǵan. Soqqynyń qatty bolǵany sonshalyq, keıbir jolaýshylar terezeden ushyp túsken, oryndyqtar ornynan julynyp ketken.
Alǵashqy kezde avtobýstaǵy adamdar esikten shyǵa almaı, tapalyp, beı-bereketsizdik oryn alǵan. Zardap shegýshilerge áýeli joldaǵy kezdeısoq kýágerler kómektesip, jeke kólikterimen aýrýhanaǵa alyp ketken. On mınýt ótkende «Jedel járdem» kólikteri de jetken. 7 ekıpaj jedel qımyldap, dárigerlik kómekke muqtaj jandardy aýrýhanalarǵa jetkizgen. Jol-kólik apatyna kináli №7 avtobýstyń júrgizýshisiniń jaraqaty aýyr, ony oryndyq arasyna qystyrylyp qalǵan jerinen qutqarýshylar shyǵaryp alǵan.
Batys Qazaqstan oblysy densaýlyq saqtaý basqarmasynyń bólim basshysy Aıgúl Qulbaraqovanyń málimdeýinshe, oblystyq klınıkalyq aýrýhanaǵa 17 adam túsken, qalalyq kópbeıindi aýrýhanaǵa 41 adam ákelingen. Olardyń 5-eýi aýrýhanaǵa jatqyzylǵan. Jolaýshylardyń biriniń ıyq súıegi synsa, tórteýiniń mıy shaıqalǵan. Apatta kámeletke tolmaǵan 5 bala da zardap shekken, olar dárigerlerdiń tolyq tekserýinen keıin úılerine qaıtarylǵan.
- Qazaqstan Respýblıkasy Qylmystyq kodeksiniń 345 baby, 1 tarmaǵy boıynsha is qozǵaldy. Jol-kólik oqıǵasynan «Reno Daster» jáne «Largýs» avtokólikteri de zardap shekken. Qazir barlyq avtokólik aıypturaǵyna jetkizildi, tıisti saraptamalar jasalyp jatyr, - deıdi BQO Ishki ister basqarmasy jergilikti polısııa qyzmetiniń bastyǵy Manarbek Ǵabdýllın.
Batys Qazaqstan oblysynyń ákimi Altaı Kólginov osydan bir kún buryn ǵana jolaýshylar tasymalyna jaýapty kompanııalardyń jumysyn qadaǵalaý qajettigin eskertip, «Avtobýstardy jańartýdan bastap, kondýktorlar men júrgizýshilerdiń arnaıy kıim kııýin, jolaýshylarmen qarym-qatynasyna deıin retke kelýi qajet», – degen bolatyn. О́ıtkeni jaqynda ǵana Oral qalasynda jol júrý quny 80 teńgege kóterilgenimen, jolaýshy tasymaldaý sapasy halyqtyń kóńilinen shyqpaı, shaǵym kóbeıip tur. Ásirese №5, 7, 22 baǵytyndaǵy avtobýstar jol erejesin jıi buzyp, bir-birimen jarysatyny týraly buryn da talaı aıtylyp kelgen edi.
Qazbek QUTTYMURATULY
«Egemen Qazaqstan»