Senat janyndaǵy Inklıýzııa jónindegi keńestiń tóraǵasy Lázzat Qaltaeva jańa Konstıtýsııa jobasyn qoldap, onda múgedektigi bar azamattardyń quqyqtary men múddeleri tolyq qamtamasyz etilgenin atap ótti, dep habarlaıdy Egemen.kz.
Konstıtýsııalyq komıssııanyń toǵyzynshy otyrysynda ol jańa Konstıtýsııa adamnyń quqyqtary men bostandyqtarynyń eń joǵary qundylyq ekenine mańyz beretinin aıtty. Bul prınsıp tikeleı múgedektigi bar adamdarǵa da qatysty.
«Jańa Konstıtýsııa jobasy azamattardy jasyna, aýrýyna, múgedektigine nemese basqa zańdy negizderge baılanysty áleýmettik qamtamasyz etý kepildikterin qamtıdy. Sonymen birge memleket pen qoǵamnyń múgedektik máselelerine kózqarasy tek zańnamalyq deńgeıde ǵana emes, is júzinde de - teń quqyqtardy moıyndaý jáne teń múmkindikter jasaý qaǵıdasyna súıenýi qajet», dedi Lázzat Qaltaeva.
Ol jańa Konstıtýsııa jobasynyń kez kelgen dıskrımınasııaǵa jol bermeý prınsıpin saqtaıtynyna erekshe toqtaldy. Osy turǵyda múgedektigi bar adamdar úshin teń qoljetimdilikti qamtamasyz etý – adam quqyqtaryn iske asyrýdyń ajyramas bóligi sanalady.
Baqyt Nurmuhanov: Jańa Konstıtýsııanyń jobasyna teńgeni ulttyq valıýta retinde bekitetin norma engizildi
«Qazaqstan Respýblıkasynyń múgedekterdiń quqyqtary jónindegi konvensııadan týyndaıtyn mindettemeleri jańa Konstıtýsııa qabyldanǵan jaǵdaıda tolyq kólemde saqtalady», dedi Senat janyndaǵy ınklıýzııa jónindegi keńestiń tóraǵasy.
Onyń aıtýynsha, jańa Konstıtýsııa jobasynyń alǵashqy baptarynda-aq, Konstıtýsııalyq qurylym negizderine arnalǵan bólimde, azamattardyń jaǵdaıyn nasharlatatyn normalardyń keri kúshin qoldanýǵa jol bermeý qaǵıdaty bekitilgen.
Lázzat Qaltaeva bul tásildi quqyq qoldaný tájirıbesinde de birtindep júzege asyrý qajet ekenin aıtty.
«Aldyńǵy otyrystarda jańa Konstıtýsııa jobasyn respýblıkalyq referendýmǵa shyǵarý máselesi qaraldy. Bul – memleket úshin Ata Zań sanalatyn qujat. Árbir azamat óz pikirin teń bildirýi tıis», dedi ol.
Sondaı-aq Lázzat Qaltaeva jańa Konstıtýsııa mátinin ınklıýzıv formattarǵa: kórý múmkindigi shekteýli adamdar úshin – Braıl qarpimen, ıntellektýaldyq damýynda qıyndyqtary bar adamdar úshin – túsinikti tilge aýdarý qajettigin atap ótti.
«Volonterlik» uǵymyn Konstıtýsııada bekitý usynyldy
Qorytyndylaı kele, ol jańa Konstıtýsııa jobasynda azamattardyń memlekettik basqarýǵa qatysýyn keńeıtýge baǵyttalǵan normalar bar ekenin atap ótti. Bul áleýmettik turǵydan osal toptardyń quqyqtaryn qorǵaýdy jáne ınklıýzııany tıimdi júzege asyrýǵa qosymsha múmkindikter beredi.
«Atalǵan tásilderdi, sondaı-aq sarapshylar, azamattyq qoǵam ókilderi men halyq pikiri negizinde aıtylǵan konstrýktıvti usynystardy eskere otyryp, jańa Konstıtýsııa jobasyn quqyqtyq jáne áleýmettik damyǵan memlekettiń mańyzdy negizi retinde qoldaýǵa bolady dep esepteımin», dep túıindedi Lázzat Qaltaeva.
Aıta keteıik, búgin, 7 aqpanda Qazaqstanda Konstıtýsııalyq reforma jónindegi komıssııanyń kezekti otyrysy ótti.