«Pıng-pong hanshaıymy» dep atalatyn áleýmettik joba – Qazaqstanda balalar úıiniń tárbıelenýshi qyzdary arasynda ústel tennısiniń týrnıri. Jarys qorytyndysy boıynsha jeńimpaz dep tanylǵandar Beıjiń qalasyna joldama alyp, ondaǵy sport akademııasynyń jattyqtyrýshylarynan arnaıy sheberlik dáristerin alý múmkindigine ıe bolady. «Baýyrjan» qaıyrymdylyq qory, Almatydaǵy Qytaı Halyq Respýblıkasynyń Bas konsýldyǵy, «Nur Otan» partııasy, Qazaqstan Respýblıkasynyń ústel tennısi federasııasy jáne Huawei Kazakhstan kompanııasynyń uıymdastyrýymen qolǵa alynǵan ıgi bastama – jetim balalar arasyndaǵy ústel tennısi daryndaryn taýyp, qazaqstandyq tennıs sportynyń keńge qanat jaıýyn kózdeıdi.
Jarysqa eki aı boıy elimizdiń 10 aımaǵynda ótken irikteý týrnırlerinde dara shyqqan 40 balalar úıinen 60 tárbıelenýshi qyz qatysty. Olar eki jas erekshelikteri boıynsha jekeleı synǵa tústi. Nátıjesinde 7-10 jas aralyǵyndaǵy qyzdar ishinde júzden júırik shyqqan Qostanaı oblystyq balalar úıiniń tárbıelenýshisi Marııa Zamotoılo I orynǵa ıe boldy. Osy jas ereksheligi boıynsha II oryndy Oral oblystyq balalar úıiniń tárbıelenýshisi Vera Molotkova enshilese, Talǵar qalasyndaǵy «Nur» balalar úıiniń shákirti Natalıa Gýrına úzdik úshtikti túıindedi. Al 11 men 14 jas aralyǵyndaǵy saıysqa túsken qyzdar ishinde Pavlodar oblysyndaǵy Kachırskıı balalar úıiniń oqýshysy Laýra Muhametjanova jeńimpaz dep tanylyp, kórermenderdi tánti etti. II oryn Aqmola oblysyndaǵy Aqkól balalar úıinen kelgen Nazı Djalagonııaǵa, qola medal Qaraǵandy oblysyndaǵy «Tańsholpan» balalar úıiniń oqýshysy Nazıra Abylqasovaǵa buıyrdy. Osylaısha, eki jas ereksheligi boıynsha jeńimpaz atanǵan Marııa Zamotoılo men Laýra Muhametjanova aldaǵy qyrkúıek aıynda Beıjińge baryp, bir apta boıy tájirıbeli mamandardan sabaq alyp, úlken sporttyń qyr-syryna qanyǵatyn bolady. Jarystyń saltanatty jabylý rásimi kezinde týrnırge qatysýshy barlyq balaǵa maqtaý qaǵazdary men syı-sııapattar tabystaldy.
Týrnır uıymdastyrýshylary buǵan deıin qazaqstandyq jastardyń sportqa degen qyzyǵýshylyǵyn oıatý maqsatynda elimizdiń túkpir-túkpirindegi 100 jetimder úıine 100 tennıs oınaıtyn ústel men sporttyq jabdyqtar syıǵa tartqan bolatyn. Endi balalar úıiniń tárbıelenýshileri olımpııalyq sport túrine enetin ústel tennısin oınap, erkin jattyǵý jasap sheberlikterin shyńdaı alady.
Arman OKTIаBR, «Egemen Qazaqstan»
ALMATY