Aýyr atletıkadan 94 kıloǵa deıingi salmaq dárejesinde óner kórsetken Rústem Sybaı eki jattyǵý qosyndysynda 382 kılo (168+215) nátıje kórsetip, Ýnıversıadanyń kúmis júldegeri atandy. Bul básekede reseılik ziltemirshi Egor Klımonov bizdiń atletten bir ǵana kılo artyq kóterip, altyn medaldy ıelenip ketti. Al qola júlde Taılandtyń sańlaǵy Sarat Sýmpradıtke buıyrdy. Onyń nátıjesi – 381 kılo.
Stýdent jastardyń búkilálemdik sporttyq jarysynda jalpykomandalyq esepte Ońtústik Koreıa eliniń atletteri aldyna jan salar emes. Keshegi kúngi kestedegi nátıje boıynsha, Koreıa quramasynyń qorjynynda 23 altyn, 14 kúmis jáne 19 qola medal (barlyǵy – 56) bar. Olardy ókshelep kele jatqan Japonııa quramasy 17 altyn, 11 kúmis jáne 17 qola júlde (45) jeńip aldy. Al buǵan deıin úshinshi orynda turǵan Taıvan quramasyn Reseı eliniń stýdentteri basyp ozdy. Qazir Reseı quramasynyń enshisinde 12 altyn, 16 kúmis jáne 24 qola medal (52) bar.
Qazaqstannyń sportshy stýdentteri ázirge 3 altyn, 3 kúmis jáne 5 qola júldemen toǵyzynshy orynda tur.
Qaırat ÁBILDA, «Egemen Qazaqstan»