EKSPO qalashyǵyndaǵy Fınlıandııa pavılonynda Fınlıandııa Mádenıet jáne bilim mınıstri Sannı Gran-Laasonen men Bilim jáne ǵylym mınıstrliginiń jaýapty hatshysy Aryn Orsarıev bastaǵan qos taraptyń ókilderi bilim salasynda memorandýmdarǵa qol qoıdy.
Otandyq bilim júıesiniń damýyna fın eliniń de úlesi bar. Bul oraıda 2012 jyldan beri elimizben tyǵyz jumys istep kele jatqan KFEIG konsorsıýmyn ataýǵa bolady. Fınlıandııanyń Iývıaskıýlıa, Lahtı jáne Hıame qalalaryndaǵy ýnıversıtetter qazaqstandyq bilim júıesi úshin mańyzy zor ınnovasııalyq jobalardy júzege asyrýda. Konsorsıým elimizdiń Densaýlyq saqtaý mınıstrliginiń áriptesi retinde medısınalyq mamandyqtardy, ásirese, medbıke isi, medısına ýnıversıtetteri men kolledjderdegi pedagogtardyń biliktiligin kóterýge qyzmet etedi.
2013 jyldan bastap qazaqstandyq medbıkelerdiń biliktilik deńgeıin kóterý úshin fın oqý oryndarymen áriptestik baılanys ornaǵan bolsa, 2014 jyly Dúnıejúzilik bank jobasynyń aıasynda fın baǵdarlamasy boıynsha bakalavr biliktiligin alýǵa qanatqaqty baǵdarlama daıarlandy. Iývıaskıýlıa jáne Lahtı qalalaryndaǵy ýnıversıtetter Astana qalasy ákimdiginiń joǵary medısınalyq kolledjimen, Respýblıkalyq medısınalyq kolledjben (Almaty q.) jáne Túrkistan kópsalaly joǵary medısınalyq kolledjimen 2016-2019 jyldarǵa kelisimshart túzip, áriptestik baılanys ornatqan. Odan bólek fındik áriptester elimizde jáne Fınlıandııada medısına salasy boıynsha 40 shaqty sheberlik synyptaryn ótkizgen. Oǵan osy salanyń 700-den asa pedagogtary qatysqan.
Shara barysynda sóz alǵan Fınlıandııa Mádenıet jáne bilim mınıstri Sannı Gran-Laasonen hanym fın elindegi bilim júıesiniń artyqshylyqtaryna toqtaldy. Ekijaqty áriptestiktiń jaqsy nátıje beretinine senim bildirdi. Sońǵy birer jyl kóleminde Fınlıandııanyń bilim salasynyń taǵy da eki qadam alǵa attaǵanyn málimdedi.
Sonymen, bul joly Iývıaskıýlıa qoldanbaly ǵylymdar ýnıversıteti men Qazaq medısınalyq úzdiksiz bilim berý ýnıversıteti arasynda kelisimshartqa qol qoıyldy. Aldyn ala josparlanǵan bul kelisimshartqa sáıkes medbıke isi mamandyǵy boıynsha magıstr dárejesin alý úshin 20 shaqty adam Almatyda17-18 tamyzda emtıhan tapsyryp, oqýǵa túsken. Olar eki eldiń de dıplomyna ıe bolmaq.
Sondaı-aq, taǵy bir kelisimshart Iývıaskıýlıa qoldanbaly ǵylymdar ýnıversıteti, Hıame qoldanbaly ǵylymdar ýnıversıteti men «Nazarbaev zııatkerlik mektepteri» derbes bilim berý uıymdary arasynda túzildi. «Nazarbaev zııatkerlik mektepteri» DBBU Basqarma tóraǵasynyń orynbasary Svetlana Esbosynovanyń aıtýynsha, fın eli bastaýysh mektepte bilim berý men orta mektepte bilim berý isine qatty mańyz beredi. Sol sebepti, bul elde bastaýysh mektepte birneshe til biletin, magıstr dárejesi bar pedagogtar jumys isteıdi. Bul oraıda, Nazarbaev zııatkerlik mektepteriniń de fın elinen úıreneri az emes. Svetlana Esbosynova osynyń aldynda birli-jarym ustazdardyń fın elinen oqyp kelgenin alǵa tartty. Endigi jerde kelisimshartqa sáıkes, zııatkerlik mektepterdiń ustazdaryn fın elinde oqytý múmkindigi artpaq.
Aıgúl Seıil,
"Egemen Qazaqstan"