Búgin Vengrııa astanasy Býdapesht qalasynda dzıýdodan álem chempıonatynyń jalaýy jelbireıdi. Jyldyń eń mańyzdy dodasyna dúnıe júziniń 64 elinen kelgen 428 dzıýdoshy qatysady. Qazaqstan ulttyq quramasy sapynda 17 dzıýdoshy el namysyn qorǵaıdy. Osy baıraqty báseke aldynda dzıýdodan ulttyq quramanyń bas bapkeri Ermek IMAMBEKOVKE habarlasyp, shákirtteriniń dúbirli dodaǵa daıyndyǵyn suraǵan bolatynbyz.
– Vengrııaǵa 19 tamyz kúni ushyp keldik. Astana men Býdapesht arasyndaǵy ýaqyt aıyrmashylyǵy tórt saǵat. Sportshylarymyzdyń jarys ýaqytynda ózderin qolaısyz sezinbes úshin, ýaqyt aıyrmashylyǵy men kún raıyna aldyn ala beıimdelý maqsatynda jarys bolatyn elge erte keldik. Sondaı-aq, álem chempıonaty aldyndaǵy sońǵy oqý-jattyǵý jumystaryn da osy elde ótkizdik. Vengrııada Armenııa, Iordanııa, Vetnam, Kýba, Qyrǵyzstan elderiniń sportshylarymen birge segiz kúndik jattyǵý jumystaryn aıaqtap, sportshylarymyzdyń psıhologııalyq daıyndyǵyn pysyqtadyq. Bastysy, dzıýdoshylarymyz jaraqattan din aman, – dedi E.Imambekov.
– Álem chempıony Eldos Smetovtiń osy álem birinshiligine daıyndyǵy týraly ne aıtasyz?
– Eldos Smetov Rıo-2016 Olımpıadasynan keıin aqpan aıynda Germanııanyń Dıýsseldorf qalasynda ótken Gran-prı týrnırinde sátsiz óner kórsetti. Keıinnen jaraqat alyp, uzaq ýaqyt qurama sapynan shyǵyp qalǵan bolatyn. Jaraqatynan aıyǵyp kelgen soń, shilde aıynda Saarbrıýkkende ótken Eýropanyń ashyq kýbogynda «qolaǵa» qol jetkizip, babynda ekenin dáleldedi. Qazirgi tańda balýanymyzdyń jaǵdaıy jaqsy. Oqý-jattyǵý jumystarynda da jaqsy kúres kórsetip, babynda ekenin baıqatty.
– Eki jyl buryn elimizde ótken álem chempıonatynda eki medal ıelenip edik. Bıyl da osy mejeni qaıtalaı alamyz ba?
– Bıylǵy álem birinshiliginde erler quramasynan eki medal alýdy josparlap otyrmyz. Quramamyzda eki álem chempıony bar. Olar – Eldos Smetov (60 kg) pen Maksım Rakov (-100 kg). Osy eki dzıýdoshymyz kók týymyzdy jelbiretedi dep úmittenemiz. Basqa sportshylarymyz da osal emes. Alaıda, bul jerge «sen tur, men ataıyn» deıtin kil myqtylar keletin bolǵandyqtan, sportshylardyń shama-sharqyn baǵamdaǵan durys. Árıne, medal sany biz oılaǵan shamadan asyp tússe, nur ústine nur bolar edi. Aryq aıtyp, semiz shyqqanǵa ne jetsin.
– Bıylǵy doda erejesinde azdaǵan ózgerister bar sııaqty. Olardyń dzıýdoshylarǵa degen áseri qandaı bolady dep oılaısyz?
– Iá, jyl basynda Halyqaralyq dzıýdo federasııasy dzıýdodaǵy keıbir erejelerge ózgeris engizip, komandalyq saıysty Olımpııa oıyndaryna engizgenin habarlady. Aldaǵy álem birinshiligi qańtarda qabyldanǵan jańa erejeler men talaptarǵa saı ótedi. Máselen, buryn komandalyq saıysta dzıýdoshylar bes salmaq boıynsha beldesse, qazir erler – úsh, qyzdar úsh salmaqta ózara myqtyny anyqtaıdy. Taǵy bir erekshelik, osy ýaqytqa deıin erler men áıelder arasynda eki komanda jasaqtalyp, jerebe bólek-bólek tartylsa, qazir úsh áıel jáne úsh er dzıýdoshydan turatyn 6 adamdyq bir komanda bolyp kúresedi. Qazaqstan erler quramasynan komandalyq saıysqa alty dzıýdoshyny daıyndap otyrmyz. Negizgi quramda Jansaı Smaǵulov (73 kg), Islam Bozbaev (90 kg) jáne bıylǵy «Qazaqstan barysy» atanǵan Elaman Erǵalıev (+100 kg) bar. Al qosalqy quramnan Erasyl Sákenuly (73 kg), Ázız Qalqamanuly (90 kg) jáne Erjan Shynkeev (+100 kg) kúresýi múmkin.
– Áńgimeńizge rahmet. Balýandarymyzǵa sáttilik tileımiz.
Álı BITО́RE,
«Egemen Qzaaqstan»