Búgin EKSPO-2017 Halyqaralyq mamandandyrylǵan kórmesi aıasynda Vetnam Sosıalıstik Respýblıkasynyń Ulttyq kúni merekelendi.
Vetnam Mádenıet, sport jáne týrızm mınıstri Ngýen Ngok Thennyń aıtýynsha, Vetnamda kún, jel energııasy jáne bıomassa eldedi ulttyq energııany damytý bas josparyna engizilgen. 2015 jyly Vetnam Úkimeti eldiń 2030 jáne 2050 jylǵa qaraı jańartylatyn energııanyń damý strategııasyn jarııalady.
«Qazaqstandy «Bolashaq energııasy» taqyrybyndaǵy EKSPO-2017 Halyqaralyq mamandandyrylǵan kórmesin sátti ótkizýimen quttyqtaımyn. Vetnam Sosıalıstik Respýblıkasy - Astana qalasyndaǵy Kórmege qatysýyn rastaǵan alǵashqy memleketterdiń biri. Pavılonnyń taqyryby: «Dástúrli jáne zamanaýı energetıka qosylysy– Vetnamnyń bolashaq energııasy». Memleket pavılony taza energııa kózderine negizdelgen, sondaı-aq dástúr men erekshe mádenı qundylyqtardy sıpattaıdy», - dedi Ngýen Ngok Then.
О́z kezeginde Májilis Tóraǵasynyń orynbasary Vladımır Bojko Vetnamnyń ekspozısııasy EKSPO-2017 Kórmesindegi eń qyzyqty pavılondardyń biri ekendigin atap ótti.
«Vetnam Sosıalıstik Respýblıkasynyń Ulttyq pavılony kórmege kelýshilerdiń nazaryn aýdaratyndyǵy málim. Statıstıka boıynsha sońǵy jyldary memleket ozyq ınnovasııalardy tıimdi engizý arqyly Azııadaǵy ekonomıkasy qarqyndy damyǵan elder qatarynan oryn aldy. Vetnam Úkimeti ulttyq energetıkalyq júıeni, ásirese jańartylatyn energııanyń balamaly kózderin damytýǵa erekshe nazar aýdarady»,- dep qorytyndylady Májilis Tóraǵasynyń orynbasary.
Vetnam Sosıalıstik Respýblıkasy - Azııanyń ońtústik-shyǵysynda, sondaı-aq Úndiqytaı túbeginiń shyǵys bóliginde ornalasqan jáne kórkem tabıǵaty, kóne ǵıbadathana keshenderi jáne mádenı murasymen belgili. Dúnıejúzilik bank esebinde Vetnamnyń sý energetıkalyq áleýetin damytý turǵysynan álemdegi jetekshi 14 el qatarynda ekendigi eskerilgen. Sondaı-aq, Vetnamnyń jel energııasyn óndirý jáne kún energııasyn paıdalaný múmkindigi zor.