Balalar úıindegi on balany baýyryna basyp, asyrap-jetkizgen Qarlyǵa men Nurlan Sadyqovtardyń otbasy búginde tamyryn tereńge tartqan máýeli báıterekke aınalyp otyr. Jýyrda Qostanaıdan elordaǵa qydyryp kelgenin estip, ǵıbratty otbasynyń ónegeli áńgimesin tyńdaýǵa asyqtyq. 27 jasynda on eki balanyń anasy atanǵan Qarlyǵa bala baǵýmen ótken jastyq shaǵynyń áserli kezeńderi týraly áńgimelep berse, Nurlannyń Qostanaı óńirinen qazaq mektebin ashýǵa bastamashy bolǵanyn estip, erlikke baladyq.
«Toqsanynshy jyldary Arqalyqta tastandy balalarǵa arnalǵan bir-aq úı bolatyn» dep bastady áńgimesin Nurlan Sadyqov.
«Qarlyǵa balalar úıinde tárbıeshi bolyp jumys istedi. 26 balany qyryq shaqty kútýshi jabylyp qaraıtyn. Qazaq tobynda on bala boldy. Ol kezde jubaıym ekeýmizdiń eki balamyz bar edi. Joldasymnyń densaýlyǵyna baılanysty, dárigerler eki uldan keıin qursaq kóterýge bolmaıtyndyǵyn eskertti. «Kóp balaly bolsaq» degen tilek janymyzǵa maza bermeı, aqyry, ákimniń orynbasaryna bala asyrap alý týraly sheshimimdi aıttym», dedi Nurlan.
Qos jastyń sheshimine qoldaý kórsetken sol kezdegi Torǵaı oblysynyń ákimi Jaqan Qosabaevtyń basshylyǵymen úsh bólmeli úı tartý etkenin rızalyqpen eske alysqan olar, qujat jınaý kezindegi qıyndyqtar týraly da qozǵap ótti.
«Bala asyrap alý isin jeńildetý kerek. Balalar múddesin kózdeıtin memlekettik saıasatty áli de bolsyn nyǵaıta túsý qajet dep oılaımyn. Qanshama jylap júrgen jetim bala bar. Jalpy, bala asyrap alý boıynsha zańda qamtylmaǵan sharýa kóp. 15-16 túrli qujat jınaýdyń ne keregi bar?» degen erli-zaıyptylardyń sózinen kezindegi qujat jınaýdaǵy jarty jyldyq sabylystyń mashaqatyn áli de bolsyn umytpaǵandaryn ańǵardyq.
«Qolymyzda azyn-aýlaq malymyz boldy. Sonymen kúndelikti iship-jemimizdi aıyrdyq. Sút pisirip, qaımaǵyn aldyq, maı shaıqadyq. Aıran uıytyp, qurt jasadyq degendeı. О́zimiz jemesek te, shoshqa baqtyq. Bir shoshqa on tól beredi, bir qoıdyń bir qozysyn qonaq jep qoıady, bolmasa ólip qalady. Taýyq ustap, jumyrtqa sattyq. Bárin istedik. Bizdiń qashanǵy ádetimiz – erte turyp, erte uıyqtaý. Kim kóp eńbek etse, baq soǵan qonady» deıdi ol.
Olar keıin Arqalyqtan Qostanaıdyń irgesindegi Zarechnyı aýylyna kóship keledi. Biraq aýylda qazaq mektebi bolmaı, on balany kún saıyn Qostanaıdaǵy Y.Altynsarın atyndaǵy daryndy balalarǵa arnalǵan mektepke tasý tıimsiz bolǵanyn aıtady. «Degenmen, ákimdikke aıtyp júrip, aýylda qazaq mektebin ashý týraly bastamany kóterdim. Elý balanyń basyn qosqannan keıin, 1999 jyly aýylda jańa mektep salynatyn boldy. Sol mektepke alǵashqylardyń biri bolyp barǵan bir qyzym, qazir sol oqý orynynda muǵalim bolyp, sabaq berip júrgenine bes jyldan asty», degen otaǵasyny azamattyǵyna súısindik.
Nurlan men Qarlyǵadan bala tárbıesindegi bereke men birliktiń qupııasyn suradyq. «Bireýge paıdań tımese de, zııanyń tımesin» degen qaǵıdamen ósirdik degen olar, bala tárbıesindegi eń mańyzdysy – tańdaý erkindigine múmkindik berý ekenin aıtady. Balalardyń kishkentaı júregine dyq qaldyrmaıyq dep, kúni búginge deıin asyrap alǵandaryn aıtyp kórmegen.
«Es bile bastaǵanda, mektepte 5-6 synyp oqyp júrgende eki-úsheýi «Balalar, muǵalimder bir-birimen sóılesken kezde nege bizdi asyrandylar dep aıtady» dep jylap keldi. Qansha aıtpaýǵa tyrysqanmen, el arasynda sóz jata ma. Dırektorǵa kirip, ata-analarmen jeke-jeke sóılesip, túsindirip aıttyq. Olar ózderi suramasa, biz aıtpaımyz dep sheshtik. Áıtpese, bizge jýrnalıster kóp habarlasady, jeke ómirimizge aralaspasyn dep suhbat berýge jolamaıtynymyz sodan» dedi Qarlyǵa.
Sóz arasynda redaksııaǵa ózderimen ala kelgen fotosýretterdi birge tamashalap, máre-sáre shattyqqa tolǵan shańyraqtaǵy qýanyshty sátterge kýá bolystyq. Qazir balalar túgeldeı derlik otaý kóterip, shańyraq qurǵan. Búginde baýyr eti balalarynan on nemere súıgen Nurlan men Qarlyǵa Jaratqannan jarylqaý tilegen batagóı ata-ájege aınalyp otyr.
Aıa О́MIRTAI,
«Egemen Qazaqstan»
Sýretter jeke arhıvten alyndy