Senat Tóraǵasy Qasym-Jomart Toqaev EKSPO-2017 kórmesindegi Vatıkannyń Ulttyq kúniniń ashylý saltanatynda sóz sóıledi, dep habarlady Senattyń baspasóz qyzmeti.
Q.Toqaev halyqaralyq mamandandyrylǵan kórmege qatysqany úshin Kıeli Taqqa alǵys aıta kelip, Qazaqstan EKSPO-2017 kórmesin bizdiń ǵalamshardyń keleshegi úshin «taza energetıkany» damytý ıdeıasyn ilgeriletýge arnalǵan jahandyq alań retinde qarastyratynyn atap ótti. Kórmege 115 el men 22 halyqaralyq uıym qatysýda, kelýshilerdiń sany, onyń ishinde álemniń basqa da elderinen kelgenderdi qosqanda, úsh mıllıonnan asyp ketti. «Bizdiń elordamyzda osyndaı aýqymdy sharany uıymdastyrý týraly bastamany Memleket basshysy Nursultan Nazarbaev kótergen bolatyn», dep atap ótti Senat Tóraǵasy.
Q.Toqaev «jasyl tehnologııalardy» qoldanýdaǵy Vatıkannyń jetistikteri kóptegen elderge laıyqty úlgi ekenin aıtty. Vatıkan pavılony energetıka máselelerin materıaldyq turǵydan ǵana emes, rýhanı turǵyda da izdestirýge shaqyrýdy pash etetinine nazar aýdaryldy. Bul jerde bizdiń ǵalamshardyń keleshegi jolyndaǵy adamnyń negizgi róli men jaýapkershiligi týraly sóz bolyp otyr.
Parlament joǵarǵy palatasynyń basshysy bıyl dıplomatııalyq qatynastar ornaǵanyna 25 jyl tolǵanyn atap ótetin Qazaqstan men Vatıkannyń jan-jaqty ózara is-qımyl men senimdi únqatysý qalyptastyrǵanyn eske saldy.
«Qazaqstan Rım Papasy kelgen Ortalyq Azııadaǵy birden-bir memleket bolyp otyr. Biz ony el ishinde ǵana emes, halyqaralyq qoǵamdastyqta da Qazaqstannyń beıbitshil saıasatynyń nátıjesin naqtylaıtyn erekshe oqıǵa retinde baǵalaımyz», dedi Q.Toqaev.
Senat Tóraǵasy Álemdik jáne dástúrli dinder lıderleri sezin jan-jaqty qoldaǵany jáne oǵan belsendi qatysqany úshin Rım-katolık shirkeýine rızashylyq bildirdi. Bul forým kórnekti dinı qaıratkerler men saıasatkerler, halyqaralyq uıymdardyń basshylary qazirgi zamandaǵy asa mańyzdy máseleler boıynsha pikir almasatyn áıgili únqatysý alańyna aınaldy. Kelesi VI sezdi 2018 jyly 10-11 qazanda Astanada ótkizý josparlandy. Forýmnyń basty taqyryby «Dinı kóshbasshylar qaýipsiz álem jolynda» dep atalady.
Sol kúni Q. Toqaev EKSPO-2017 kórmesindegi Vatıkan seksııasynyń komıssary, Ádilettilik jáne beıbitshilik jónindegi Papa keńesiniń tóraǵasy kardınal Pıter Tıorksonmen kezdesti. Júzdesýshiler ekijaqty yntymaqtastyqtyń keleshegi men dinaralyq únqatysýdy damytý jaıyn talqylady.