Astanada ótip jatqan «Álem barysy ‒ 2017» týrnıriniń ekinshi kezeńinde qazaqstandyq tórt balýan kelesi kezeńge ótip, 1-eýi jeńilip qaldy.
Dáýren Nuralıev ekinshi aınalymda ózbek Mýhsın Hısomıddınovqa ese jiberdi.
О́zbek balýany á degennen-aq Dáýrendi oń jambasqa saldy. Beldesý tizginin qolyna alǵan Mýhsın kezdesýdiń qalǵan bóliginde óz artyqshylyǵyn jibergen joq. Ábden dińkelegen Dáýren jekpe-jektiń sońyna taman baryn salǵan. Alaıda qarsylasy Dáýrenniń jaýyrynyn jer ıisketip ketti.
Boz kilemge ekinshi bolyp Aıbek Nuǵymarov kóterildi. Ol polshalyq Petr Tomash Talachpen kúsh synasty. Teketirespen ótken beldesýde Aıbek polıaktan basym tústi. Esterińizge sala keteıik, Talach 2016 jyly Polsha quramasy sapynda Eýrazııa barysyna qatysqan bolatyn.
Elaman Erǵalıev ońtústik koreıalyq Bıongva Lımen beldesip, 9 sekýndtyń ishinde taza ádispen tize búktirdi.
Absolıýtti salmaq dárejesindegi Qazaqstan chempıony Aıbat Seıten argentınalyq Lýchıano del Rıomen beldesti. Aıbat argentınalyqtan aılasyn asyryp, 3 mınýt ishinde taza jeńiske qol jetkizdi.
Qazaqstan atynan týrnırge qatysyp jatqan besinshi balýan Erjan Shynkeev estonııalyq Lepp Dmıtrıımen kúsh synasty. Tájirıbeli qaraǵandylyq balýan qarsylasyn urshyqsha úıirip, jaýyrynyn jer ıisketti.
Kelesi kezeńge joldama alǵan Elaman ýkraın sportshysy Anton Rýdnıkpen boz kilemge shyǵady. Aıbek Nuǵymarov ózbekstandyq Mýhsın Hısomıddınovpen kúsh synassa, Aıbat grekııalyq Tentore Masmanıdıspen beldesedi. Al Erjan Shynkeev sırııalyq balýanmen kezdesedi.
Aıta keteıik, alda-jalda Aıbek pen Elaman qarsylastaryn jeńse, shırek fınalda ózara jolyǵady.