Ispanııanyń «Estadıo de la Seramıka» stadıonynda «Vılıarrealdyń» bas bapkeri Frana Eskrıbanyń qatysýymen baspasóz konferensııasy ótti.
- Eýropa lıgasynda komanda aldyna qandaı maqsat qoıyp otyr? Bul topta kimdi favorıt dep esepteısiz?
- Topta kimniń myqty ekenin naqty aıtý qıyndaý. Al maqsatymyz – bir orynda turyp qalmaı, damı túsý. Qazirgi ýaqytta tek erteńgi match jaıly oılanyp otyrmyz. Týrnırdi jeńispen bastaý úshin barymyzdy salamyz. Sebebi, jankúıerlerimiz bizden tek jeńisti kútedi.
- Qol astyńyzdaǵy oıynshylardyń bári erteńgi matchqa daıyn ba?
- Brýno Sorıano men Adrıano Marınadan basqasynyń bári daıyn. Al alańǵa shyǵatyn oıynshylar jaıly erteń oılanatyn bolamyz.
- BAQ betterinde sizdi «Valensııa» komandasynyń bas bapkeri bolǵysy keledi degen aqparat tarap jatyr. Sebebi, fýtbolshylyq ǵumyryńyzda dál osy «jarqanattardyń» sapynda kóbirek óner kórsetken edińiz. Osy rette kópshilik «Vılıarrealdy» sol maqsatqa jetý jolyndaǵy baspaldaq retinde qarastyryp otyr degen oı qalady.
- Shyny kerek, «Valensııaǵa» qatysty aqparat tarap jatqanyn maqtan tutamyn. Biraq «Vılıarrealda» qyzmet etip júrgenime qýanamyn. Eshqaıda ketý oıymda joq, osy jerde qalamyn. Josparymnyń bári «Vılıarrealmen» baılanysty.
- Eger match teń aıaqtalsa nemese «Astana» jeńiske jetse, bul sizderge qanshalyqty aýyr soǵady?
- Biz «Astananyń» birneshe oıynyn kórdik. Olardy jaqsy bilemiz, qalaı oınaıtyn baıqadyq. Biz jeńilis týraly múldem oılamaımyz. Erteń jigitter bar kúshterin salyp, jospardy tolyǵymen oryndaıdy dep úmittenemin. Qalaıda jeńiske jetýimiz kerek.
- Komandańyzdan jyldam goldy kútýge bola ma?
- Árıne, biz matchty alǵashqy jarty saǵatta ǵana emes tolyǵymen joǵary deńgeıde ótkizýimiz kerek. Sońǵy eki oıyndy óte nashar ótkizgendikten «Astanaǵa» qarsy bar kúsh-jigerimizdi salamyz. Bizge tek qana jeńis kerek.
- Jerebe tartylǵannan keıin tobymyzdaǵy barlyq komandalardyń ókilderi sizdi favorıt esebinde qarastyryp otyr. Bul sizderge artyq qysym bolyp eseptelmeı me?
- Ras, bári bizdi jeńedi dep oılaıdy. Biraq qarsylastarymyz ońaı emes, deńgeıleri joǵary. Favorıt ekenimizge mán bermeımiz. О́z jumysymyzdy tolyǵymen atqaryp, jankúıerlerimizdiń úmitin aqtaýymyz kerek.
- Sońǵy oıyndardyń nátıjesinen keıin sizdi qatty synaǵandar boldy. Osyndaı túrli teris pikirler sizdi jigerlendire túspeı me?
- Ol ras, sońǵy eki oıynymyz biz kútkendeı bolmady. Jeńiliske tek qana bapkerdi kináli etý qalypty jaǵdaı. Biz Eýropa lıgasynda da, Ispanııa chempıonatynda da jeńiske jetkimiz keledi. Al eń bastysy – joǵary deńgeıde óner kórsetý.
Aıta keteıik, «Vılıarreal» - «Astana» arasyndaǵy match 14 qyrkúıek kúni Vılıarreal qalasynda 23:00-de (Astana ýaqyty boıynsha) bastalady.
Aıan ÁBDÝÁLI, «Egemen Qazaqstan»