«Vılıarreal» komandasynyń bas bapkeri Fran Eskrıba Eýropa lıgasynyń toptyq kezeńinde «Astanaǵa» qarsy ótken oıyn jaıly pikir bildirdi.
- Matchtan alǵan áserińizben bólisseńiz.
- Shyny kerek, birtúrli kúıde qalyp otyrmyn. Árıne, matchtyń biz úshin oıdaǵydaı aıaqtalǵany qýantady. Biraq oıynnyń alǵashqy 25 mınýtynda qarsylastarymyz bizdi óz alańymyzda qyspaqqa alýmen boldy. Olardyń basymdyǵyn osy kezde anyq baıqadyq. Komandamdaǵy jigitter birneshe qatelikke boı aldyrdy. Degenmen, úsh upaı alǵanymyzǵa qýanyp otyrmyn.
- Búgin komandada birneshe mańyzdy oıynshy alańǵa shyǵa almady. Bakambý, Bakka, Cheryshev matchty qosalqy quramnan bastady. Siz «Astanany» ekinshi qurammen jeńemin dep oıladyńyz ba?
- Ondaı oıdan aýlaqpyn. «Astanany» qatty syılaımyn. Bul oıynda alańǵa daıyn oıynshylardy jón sanadym.
- Búgingi oıynda «Vılıarreal» jaqsy qyrynan kórinýi kerek edi. Sizdiń oıyńyzsha, «Astana» búgin jaqsy oınady ma, álde komandańyz ádettegiden osaldaý boldy ma?
- Eń basty qateligimiz – doptan jıi aıyrylyp, kóbirek ıelik ete almadyq. «Astana» óte jaqsy komanda. Al bizdiń kóbirek gol soǵatyn múmkindigimiz bolǵan. Biraq bul oıymyzdy oıyn sońyna taman júzege asyra bildik.
- Siz «Astananyń» oıyndaryna taldaý jasadyńyz. Qazaqstandyqtardyń úsh jyl burynǵy oıynyn qaıta kórip shyqqanyńyz da anyq. Sol oıynǵa qaraǵanda «Astana» kúsheıdi dep oılaısyz ba? Qarsylastaryńyzdy úsh qorǵaýshymen oınaǵany sizder úshin kútpegen jaıt boldy ma?
- Shyny kerek, «Astanany» qorǵanysqa bes jigitti jaýapty ete me dep oıladyq. Qarsylasymyz saýatty qorǵanyp, bizge biraz qıyndyq týdyrdy. «Makkabı» men «Slavııaǵa» qarsy oıynda bári basqasha bolady dep oılaımyn. Ekinshi suraqqa keler bolsam, úsh jyl buryn men «Vılıarrealda» emes edim. Biraq «Astananyń» jyldan jylǵa damyp jatqanyn erekshe atap ótkim keledi.
- Cheryshevtiń alańǵa shyǵýy týraly oıyńyzdy bildirip ótińizshi.
- Cheryshevtiń jaraqatynan aıyǵyp, qatarǵa qosylýy biz úshin jaqsy jańalyq.
Aıan ÁBDÝÁLI, «Egemen Qazaqstan»