Jemqorlyqty birge jeńemiz

Sońǵy úsh jylda Qazaq­stan álemdik jemqorlyqqa qarsy reıtıngte birden 45-shi orynǵa kóterilip, joǵary kórsetkishke qol jetkizdi.  Jemqorlyqqa qarsy áreket Qazaqstannyń damý strategııasynyń negizgi tetigine aınaldy. Sebebi, el Prezıdentiniń ózi birneshe jyl buryn jemqorlyqqa qarsy ymyrasyz kúres jarııalady. Sondyqtan zań, quqyq qorǵaý organdary, qoǵamdyq uıymdar osy baǵytta jumys jasap keledi. Soǵan qaramastan, bas­qa elder sııaqty Qazaqstanda da jemqorlyq eń negizgi problemalardyń biri bolyp otyr. Bul áleýmettik indet sheteldik ınvestorlar aldynda memlekettiń bedelin tómendetip, saýda-ekonomıkalyq baılanystardyń damýyn baıaýlatyp, tikeleı jáne janama túrde ekonomıkalyq shyǵyn­dar­ǵa alyp keledi. Kóptegen zertteýlerdiń nátıjesi memlekettik bas­qarý neǵurlym ashyq bolsa, azamattyq qoǵam belsendi bolsa, jemqorlyq deńgeıiniń de tómendeıtinin kór­setip berýde.  Sondyqtan bul áreketke qoǵamnyń, tipti árbir adamnyń tózimsizdik kózqarasy kerek dep sanaıdy nurotandyqtar. Sol úshin partııa jemqor­lyqqa qarsy qoǵamdyq qozǵalys qurý týraly bastama kóterdi. Partııa Tóraǵasynyń birinshi orynbasary Nurlan Nyǵmatýlınniń aıtýynsha, «Búgingi birlestik – ol, eń aldymen, Elbasymyz, partııamyzdyń Tór­aǵa­sy Nursultan Ábishuly Nazarbaevtyń jemqorlyqpen kúres týraly tapsyrmasyn oryndaýǵa erekshe kómek berip, memleketimizdiń ekonomıkasynyń odan ári da­mýyna óz úlesin qosatyny sózsiz. Sol úshin osy bastama elimizdiń barlyq aımaqtarynda jalǵasyn tabatyn bolady». Bul bastamany qazirdiń ózinde  3 myńnan astam zańdy tulǵalar múddesin qorǵaıtyn elimizdegi iri ári bedeldi qoǵamdyq uıymdar qoldap otyr. Olar, Kásipkerler forýmy, Azamattyq alıans, ardagerler uıymy, Kásipodaqtar federasııasy, Jastar kongresi men Bas redaktorlar klýby. Olardyń barlyǵy búgin Áriptestik jáne ózara yntymaqtastyq týraly memorandýmǵa qol qoıdy.  «Bul – búkil álemdi jaılaǵan dert. Sondyqtan onymen kúres bir ǵana adamnyń, bolmasa  tek qana memlekettiń jumysy emes, onymen barsha halyq bolyp kúresýimiz kerek. Jáne ol bir kúnniń sharýasy emes. Sondyqtan osy óte úlken, aýqymdy sharýany birlesip kótereıik, elimizdiń odan ári damýyna birlesip atsalysaıyq degen maqsatpen «Nur Otan» partııasy bastamashy bolǵan qoǵamdyq qozǵalysqa qoldaý bildirip,  Birlesken memorandýmǵa qol qoıyp otyrmyz», – deıdi Qazaqstan Kásipodaqtary federasııasynyń tóraǵasy Sııazbek Muqashev. Partııanyń turǵyndar arasynda uıymdastyrǵan «Halyqtyń daýysy» aksııasy kórsetkendeı, qazaqstandyqtardyń denin jemqorlyq jaǵdaıy alańdatady. Sondyqtan nurotandyqtar osy jolda kúsh biriktiretin kez keldi dep esepteıdi. Onyń ústine Táýelsizdiktiń 20 jyldyq mereıtoıy úlken jaýapkershilik júkteıdi. «Qazaqstan Jastar kongresi» ZTU atqarýshy dırektory Shahmardan Baımanov: «Búgingi «Nur Otan» partııasynyń bastamasymen qurylyp jatqan qoǵamdyq qozǵalystyń basty maqsaty  – jemqorlyqqa qarsy kúsh biriktirý. Qazirgi kezde para alatyndar da, para beretinder de bizdiń ortamyzda júr. Biz ondaı adamdardy qabyldamaı, oǵan degen jastardyń, jalpy qoǵamnyń  teris kózqarasyn qalyptastyrýymyz kerek.  Sol úshin elin, halqyn oılaıtyn kez kelgen azamat osy qozǵalysqa qosylady dep oılaımyn», – dep óz oıyn ortaǵa saldy. Jańa qurylǵan uıym músheleri  eń tıimdi ári táýelsiz tóreshi qoǵamdyq baqylaý dep sanaıdy. Sol úshin belsendi túrde óz qatarlaryn kóbeıtýge kúsh salady. Búgin bastalǵan jumys aldaǵy ýaqytta barlyq aımaqtarda jalǵasyn taýyp, jemqorlyqqa qarsy forýmdar ótetin bolady. «Egemen-aqparat».