Jýyrda Petropavl qalasyna erejesiz jekpe-jek túrleri boıynsha respýblıkalyq federasııanyń prezıdenti Anatolıı Kım men birqatar jattyqtyrýshylar keldi. Ajal aýzynan aman qalsa da, ómirlik ǵarip bolyp qalǵan Erbol Hamıtovtyń jaǵdaıyn estigennen keıin, olardyń moraldyq qoldaýmen qatar materıaldyq jaǵynan da kómek qoldaryn sozýy aınalamyz júrek jylýyn joǵaltpaǵan jandarǵa toly ekenin baıqatsa kerek.
Adamgershilik qasıetterdi ardaqtaıtyn izgi qadam bıyl kolledj bitirip, odan ári Otan aldyndaǵy azamattyq boryshyn óteýdi, joǵary bilim alýdy, jattyqtyrýshy bolýdy maqsat etken 19 jastaǵy bozbalany qanattandyryp, ómirge degen qushtarlyǵyn arttyrǵan edi.
Erbol jastaıynan sportpen aınalysyp, shymyrlanyp, shynyǵyp ósti. Osydan úsh jyl buryn jekpe-jek jáne djıý-djıtsýmen júıeli túrde shuǵyldana bastaǵan. Kúrestiń ádis-tásilderin jetik meńgerýdiń arqasynda qalalyq, oblystyq jarystarǵa qatysyp, birneshe ret top jardy. Respýblıkalyq týrnırlerde júldeger atandy. Onyń eńbekqorlyǵyn, jankeshtiligin federasııa basshylyǵy joǵary baǵalap, quramaǵa qabyldaǵan bolatyn. О́mirdiń buralań joldarynda qıyn jaǵdaıǵa ushyraǵan kezde qamqorlyǵyna aldy.
Osy jyldyń 29 shildesi onyń taǵdyryn múldem basqa arnaǵa buryp jiberdi. Jastyq kezeńniń naǵyz sheshek atqan kezinde taǵdyrdyń tálkegine kezigemin dep esh oılamaǵan shyǵar. Qaladaǵy «Park-Sıtı» túngi klýbynda eki jigitpen bolǵan janjal barysynda buǵan sýyq qarý kezenip, kúsh kórsetildi. Namysty jas odan yǵa qoımaǵan. Osy oıyn-saýyq ortalyǵy janynda «Barys» basketbol komandasynyń oıynshysy Igor Nanaevty bir top áýmeser jabyla uryp, onyń sońy ólimge soqtyrǵanyn aıta ketken jón. Erteńine qos tarap kezdesý ornyn belgilegen. Sportshy jigitke kúshteri jetpesin bilgen álgi ekeý sholaq myltyqtan birneshe ret oq atqan. Nátıjesinde, Erbol aýyr jaralanyp, aýrýhanaǵa jetkizilgen. Onyń sol aıaǵyn tizeden joǵary jerden kesýge týra keldi. Osy qylmystyq iske qatysty degen kúdikpen úsh adam tutqyndalyp, tergeý amaldary júrgizilýde. Olar úsh qylmystyq oqıǵa boıynsha aıyptalyp, 15 jyldan 20 jylǵa deıin bas bostandyǵynan aıyrý jazasy kútip tur.
Erbol aýrýhanadan shyqqanymen, áli qulan-taza aıyǵa qoıǵan joq. Ázirge protez kııýge bolmaıdy. Onyń baǵasy 10 mıllıon teńge turatyn kórinedi. Er basyna túsken osyndaı qysylshań shaqta dostary, týystary, áriptesteri demeý kórsetti. Elimizdiń ár túkpirinen qoldaý bildirip jatqandar da az emes.
– Men jaı ǵana ómir súrýdi qalamaımyn. Aldaǵy maqsatym – úlken sportqa qaıta oralý. Paralımpııalyq oıyndarǵa qatysý arqyly básekelestigimdi, qol-aıaǵy balǵadaı sportshylardan kem emestigimdi dáleldeý. Oǵan erik-jigerim de, kúsh-qaıratym da, tájirıbem de tolyq jetedi. Jara jazylyp, babyma kelgen soń birden sport zalǵa tartamyn. Júzýmen, djıý-djıtsýmen, grepplıngpen aınalysamyn, – deıdi Erbol jasqa tán jigerli únmen.
Onyń úlken asýlardy baǵyndyra alatynyna jattyqtyrýshysy Ǵabıt О́tenov te bek senimdi. О́z taǵdyry óz qolynda ekenin qapysyz uqqan Erbol sport zalǵa barǵansha asyq.
О́mir ESQALI, «Egemen Qazaqstan»
Soltústik Qazaqstan oblysy