Myńnan astam astanalyq stýdenttiń qatysýymen «Báıterek» monýmentiniń qasynda jalpy respýblıkalyq «Rýhanı jańǵyrý» jastar aksııasy bastaý aldy.
Dóńgelene sap túzesken jastardyń kóńil-kúıinen ózgeshe merekelik lep esedi. Qoldaryna ustaǵan túrli-tústi shardy qalyqtatyp aspanǵa qoıa bergende, Astananyń aspanyn jaýlaǵan sharlar kóz ushynan buldyrap baryp, saǵymǵa aınaldy.
Saltanatty sharaǵa qatysqan Rıo-de Janeıro Olımpıadasynyń chempıony Danııar Eleýsinov jastardyń basyn biriktirip, izgilikke uıystyryp otyrǵan mundaı sharalardyń mańyzy zor ekenine toqtaldy. Astana qalasy Jastar saıasaty máseleleri jónindegi basqarmasynyń jetekshisi Ashat Oralov rýhanı jańǵyrýdyń alǵysharty retinde ulttyq mádenıetti saqtaý men nasıhattaý boıynsha atqarylatyn is-sharalar reti týraly baıandap ótti.
– Memleket basshysy birtutas ult bolý úshin bolashaqqa qqarqyndy qadam basýdy jáne buqaralyq sanany ózgertýde jastarǵa úlken úmit artyp otyr. Osy maqsata uıymdastyrǵan mundaı aıtýly sharadan elimizdiń belsendi jastary qalys qalmaýy qajet. Al aksııany 22 qyrkúıek kúni Kaspıı jaǵalaýynda qorytyndylaımyz, – deıdi ol.
Basqarma jetekshisiniń aıtýynsha, izgilik pen jasampazdyqty tý etken aksııa sheńberinde «Bilim», «Asar», «Taǵzym», «О́ner» atty tórt baǵytta el jastary ónege bolarlyq is-sharalar atqarylmaq. Ulttyq salt-dástúr men tarıhty jańǵyrtý maqsatynda halyq kóp jınalatyn oryndarǵa baryp, jalpyhalyqtyq vıktorına uıymdastyrylmaq. Sonymen birge, kómekke zárý zeınetkerler men jasy kelgen qarııalarǵa da qol ushyn berý, ózen ańǵarlary men saıabaqtardy tazalap, aǵash otyrǵyzý syndy birqatar ıgi isterge muryndyq bolmaq.
El aldyna úlken mindetter qoıyp, ony júzege asyrýdyń memlekettik tetikterin anyqtap bergen memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasyn qoldaý maqsatynda ótip jatqan aıtýly shara apta boıy elimizdiń túkpir-túkpirinde jalǵasady. Is-sharany Astana qalasy Jastar saıasaty máseleleri jónindegi basqarmasy uıymdastyryp otyr.
Aıa О́MIRTAI,
«Egemen Qazaqstan»