Túrki akademııasy halyqaralyq uıymynyń (TWESCO) uıymdastyrýymen qazaqstandyq jáne sheteldik bir top ǵalymdar men zertteýshiler, tilshiler «Kentaıdan Ulytaýǵa deıin: tarıhı jadynyń jańǵyrýy» III halyqaralyq ekspedısııasy jolǵa shyqqan bolatyn.
Astanadan attanǵan ekspedısııa keshe Jezqazǵanǵa jetip, aıaldaǵan. Quramynda Qazaqstan, Qyrǵyzstan, Ázirbaıjan, Túrkııa, Mońǵolııa syndy birneshe eldiń tarıhshy, jazýshy, jýrnalısteri bar top búgin Jezqazǵannan Joshy han, Alasha han, Dombaýyl kesenelerine attandy.
Atalǵan ekspedısııa Prezıdent Nursultan Nazarbaevtyń «Rýhanı jańǵyrý» baǵdarlamasyn iske asyrý maqsatynda qolǵa alynyp otyr. Akademııa basshysy Darhan Qydyráli bastaǵan quram Ulan-Batyr qalasynan bastalǵan sapardy Ulytaýda aıaqtamaq.
Esterińizge sala ketsek, Túrki akademııasy 2017 jyldyń 15 tamyzynan 17 qyrkúıegine deıin Mońǵolııa jáne Qazaqstan aýmaǵynan ótetin «Kentaıdan Ulytaýǵa deıin: tarıhı jadynyń jańǵyrýy» atty kezekti III halyqaralyq ekspedısııasyn uıymdastyrǵan bolatyn. Mońǵolııadaǵy Kentaı aımaǵynan bastaý alǵan ekspedısııa 15-16 qyrkúıek kúnderi Ulytaýdaǵy Alasha han men Joshy han keseneleriniń basynda qorytyndylanady.
Eki kúndik ekspedısııaǵa shyqqan top endi Ulytaý aýdanynyń ortalyǵy men Sátbaev qalasynda bolyp, kezdesýler ótkizedi.