Qazaqstan Prezıdenti Nursultan Nazarbaev О́zbekstan Respýblıkasynyń «El-jurt qurmeti» ordenimen marapattaldy. Ordendi Elbasynyń Tashkentke memlekettik saparynda О́zbekstan Prezıdenti Shavkat Mırzııoev tabystady.
Tashkenttegi shaǵyn jáne keńeıtilgen quramdaǵy kelisózderden keıingi birlesken málimdeme barysynda О́zbekstan basshysy Qazaqstan Prezıdenti Nursultan Ábishuly Nazarbaevty «El-jurt qurmeti» ordenimen marapattaý týraly arnaıy Jarlyqqa keshe qol qoıǵanyn aıtty. Atalǵan Jarlyqta Nursultan Ábishuly Nazarbaevtyń álemdik aýqymdaǵy kórnekti memleket jáne saıası qaıratker ekendigi jáne onyń kóregen basshylyǵynyń arqasynda álemdik qoǵamdastyqta laıyqty oryn alǵan jáne búginde qarqyndy, demokratııalyq jolmen damyp, qýatty naryqtyq ekonomıka men ashyq qoǵam qurǵan táýeliz Qazaqstan Respýblıkasynyń negizi qalanǵany aıtylǵan.
«Nursultan Ábishuly Nazarbaevtyń jeke zor úlesiniń arqasynda baýyrlas ózbek pen qazaq halyqtarynyń arasynda dostyq pen yntymaqtastyqtyń myǵym kópiriniń negizi qalandy. Osynyń negizinde qazirgi ýaqytta elder arasynda ózara tıimdi ári jemisti baılanystar damý ústinde. Baýyrlas eki el dástúrli dostyq pen strategııalyq seriktestikti tereńdetý, keńeıtý, sonymen qatar beıbitshilik úshin álemdik qoǵamdastyqty nyǵaıtýdaǵy uly eńbegine oraı Qazaqstan Respýblıkasynyń Prezıdenti Nursultan Ábishuly Nazarbaev «El-jurt qurmeti» ordenimen marapattalsyn!», delingen Jarlyqta.
Qazaqstan Prezıdenti Nursultan Nazarbaev О́zbekstannyń bul qurmeti ózi úshin erekshe «tosyn syı» bolǵanyn atap ótti. «Men ómirimde álemniń kóptegen memleketterinen, óz elimnen kóp marapat alǵan adammyn. Biraq bul marapat maǵan barlyǵynan da asa qurmetti, qymbat. Sebebi kórshi, bir týǵan eldiń qurmetine bólený ol basqa. Bilmeıtin, alystaǵy eldiki saıası. Sondyqtan men óte joǵary baǵalaımyn. Oılamaǵan jerden tosyn syı jasadyńyz. О́zbek halqy qýansa, Qazaqstan halqy da qýanamyz. О́zbek halqynda, Qudaı saqtasyn, qıynshylyq bolsa, biz ár ýaqytta birgemiz. Sizderdiń qastaryńyzdan tabylatyn bolamyz. Solaı bolýymyz kerek. Solaı bolsaq qana táýelsizdigimizdi saqtap, el bolyp, aman qalamyz», - dedi Nursultan Nazarbaev marapattaý rásiminde. Sonymen qatar Elbasy búgingi shaǵyn jáne keńeıtilgen quramdaǵy kelissózder barysynda kóp másele sheshilgendigin atap ótti. «Aldymyzǵa taǵy da maqsattar qoıdyq. Sonyń barlyǵyna jetýge Alla jazsyn. О́zbek halqyna basymdy ıip, rahmetimdi aıtamyn. Bizdiń Sizder degende kóńilimiz aq, júregimiz adal. Solaı birge jumys isteımiz», dedi Qazaqstan Prezıdenti.
Dınara BITIK, "Egemen Qazaqstan"
Tashkentten