Búgin Tashkentke memlekettik saparmen kelgen Qazaqstan Prezıdenti Nursultan Nazarbaev pen О́zbekstan Prezıdenti Shavkat Mırzııoev shaǵyn jáne keńeıtilgen quramda kelissózder ótkizdi.
Kelissózderdiń qorytyndysynda eki eldiń memleket basshylary birlesken málimdemege qol qoıdy. Munan bólek, sý qatynastary salasyndaǵy yntymaqtastyq máseleleri jónindegi jol kartasyn Qazaqstan Premer-Mınıstriniń birinshi orynbasary A.Mamın men О́zbekstan premer-mınıstriniń birinshi orynbasary A.Ramatov rásimdedi. Sonymen qatar olar qazaq-ózbek memlekettik shekarasyndaǵy ótkizý pýnkterin, avtomobıl joldaryn qaıta qurý, jańǵyrtý jáne irgeles aýmaqtardy abattandyrý jónindegi jol kartasyn bekitti. Al elimizdiń Qarjy mınıstrligi men О́zbekstannyń Memlekettik keden komıteti arasyndaǵy kontrabandamen jáne keden zańnamasyn buzýmen kúrestegi yntymaqtastyq týraly kelisimge QR Qarjy mınıstri B.Sultanov pen О́R Memlekettik keden komıtetiniń tóraǵasy M.Tohırı, Qazaqtan Úkimeti men О́zbekstan Úkimeti arasyndaǵy áskerı-tehnıkalyq saladaǵy yntymaqtastyq týraly kelisimge QR Qorǵanys jáne aeroǵarysh ónerkásibi mınıstri B.Atamqulov pen О́R Qorǵanys mınıstri A.Azızov, «Qazaqstan temir joly» UK» AQ pen «О́zbekstan temir joldary» AQ arasyndaǵy strategııalyq yntymaqtastyq týraly kelisimge «QTJ» prezıdenti Q.Alpysbaev pen «О́TJ» basqarmasy bastyǵynyń birinshi orynbasary A.Shýkýrov qol qoıdy. Sondaı-aq Qazaqstan Respýblıkasynyń Energetıka mınıstri Q.Bozymbaev jáne О́zbekstan Respýblıkasy premer-mınıstriniń birinshi orynbasary A.Ramatov Energetıka salasyndaǵy yntymaqtastyq týraly úkimetaralyq kelisimge qol qoıdy.
Sonymen qatar eki eldiń óńiraralyq yntymaqtastyǵyn damytýǵa baǵyttalǵan qujattarda rásimdeldi. Atap aıtqanda, saýda-ekonomıkalyq jáne mádenı-gýmanıtarlyq salalardaǵy Qyzylorda oblysy men Novoı oblysy, Ońtústik Qazaqtan oblysy men Tashkent, Ońtústik Qazaqtan oblysy men Syrdarııa oblysy arasyndaǵy memorandýmdarǵa atalǵan óńirlerdiń ákimderi qol qoıdy.
Dınara BITIK, "Egemen Qazaqstan" Tashkentten