Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynyń aıasynda biryńǵaı aqparattyq portal óz jumysyn bastady. Osyǵan oraı Ortalyq kommýnıkasııalar qyzmetiniń aqparattyq alańynda Bilim jáne ǵylym vıse-mınıstri Ashat Aımaǵambetov, Din isteri jáne azamattyq qoǵam vıse-mınıstri Abzal Núkenov jáne «Qazkontent» AQ basqarmasynyń tóraǵasy Evgenıı Kochetovtiń qatysýymen baspasóz máslıhaty ótti.
«Qazkontent» AQ basqarma tóraǵasy Evgenıı Kochetovtiń málimetinshe, jańa portal ruh.kz domenimen tirkelgen. Saıt «Týǵan jer», «Kıeli meken jaǵyrapııasy», «Zamanaýı Qazaqstan mádenıeti», «100 jańa oqýlyq», «100 jańa tulǵa», «Latynsha» degen alty bólimnen turady. Basty bette Elbasynyń maqalasynan úzindi jáne «Rýxanı jańǵyrý» baǵdarlamasyna qatysty barlyq jańalyq kórsetilgen», dedi E.Kochetov.
Jıyn barysynda «100 jańa esim» jobasyna 2 myńǵa jýyq ótinish kelip túskeni, 16 qyrkúıekten bastap qabyldaý toqtatylǵany aıtyldy. Jobanyń ekinshi kezeńinde arnaıy qurylǵan sarapshylar toby laıyqty tulǵalardy anyqtaıtyn bolady.
Portaldaǵy «Týǵan jer» bólimine Din isteri jáne azamattyq qoǵam mınıstrligi, «Kıeli meken jaǵyrapııasy» men «Zamanaýı Qazaqstan mádenıeti» bólimine Mádenıet jáne sport mınıstrligi, «100 jańa oqýlyq» bólimine Bilim jáne ǵylym mınıstrliginiń tarapynan mańyzdy maǵlumattar men kerekti derekter ornalastyrylady.
«Bizdiń mınıstrlik atalǵan portaldyń «Týǵan jer» bólimine óziniń jobalaryn qoıady. Sonyń biri – Áleýmettik bastamalar kartasy. Osy karta arqyly óńirlerde atqarylyp jatqan túrli áleýmettik mańyzy bar jobalardyń tizbegimen tanysa alasyzdar. Qazirgi tańda kartaǵa 83 áleýmettik joba engizildi. Bul jobalar mesenattar men qaıyrymdy jandar arqyly júzege asyp jatyr. Áleýmettik bastamalar kartasy jobasynyń negizgi maqsaty – árbir qazaqstandyq azamattyń boıyna óziniń týǵan jerine degen jaýapkershilik sezimin arttyrý jáne onyń damýyna úlesin qosýǵa múmkindik berý» dedi Din isteri jáne azamattyq qoǵam vıse-mınıstri Abzal Núkenov.
Raýan QAIDAR, «Egemen Qazaqstan»