Qazaqstan úkimeti Elbasynyń tapsyrmasymen latyn álipbıine ótý máselesin kezeń-kezeńimen júzege asyrý máselesin kún tártibine qoıdy. Memleket basshysy óziniń Joldaýynda biz 2025 jyldan bastap álipbıimizdi latyn qarpine, latyn álipbıine kóshirýge kirisýimiz kerek. Bul – ult bolyp sheshetin qaǵıdatty másele. Bir kezde tarıh bederinde biz mundaı qadamdy jasaǵanbyz, dep qadap aıtqan bolatyn.
Árıne, osyndaı memlekettik máseleden taǵdyr-talaıymen qazaq jerine ornyqqan, baqytyn osynda tapqan etnos ókilderi qalys qala almaıdy. Jaqynda Ońtústik Qazaqstan oblystyq Qazaqstan halqy Assambleıasy keńesiniń otyrysynda memlekettik tildiń latyn grafıkasyna ótý jaıy talqylandy.
«Qoǵamdyq kelisim» memlekettik mekemesiniń ǵımaratynda ótken keńestiń otyrysyna keńes músheleri men oblystaǵy etnomádenı birlestikterdiń tóraǵalary jáne Assambleıa janyndaǵy Qoǵamdyq kelisim keńesi, Analar keńesi, Ǵylymı-sarapshylyq top pen oblystyq máslıhattaǵy «El birligi» depýtattyq tobynyń jetekshileri men beldi ókilderi qatysty. Otyrysty Ońtústik Qazaqstan oblystyq Qazaqstan halqy Assambleıasy tóraǵasynyń orynbasary, oblystyq Assambleıa hatshylyǵynyń meńgerýshisi Muratáli Qalmuratov júrgizdi.
Shara barysynda OQO QHA tóraǵasynyń orynbasarlary oblystyq koreı etnomádenı birlestiginiń tóraıymy Roza Pak pen oblystyq grýzın etnomádenı birlestiginiń tóraǵasy Zaal Bochorıshvılı, Qazaqstandaǵy ózbekter qoǵamdyq birlestikteri «Dýstlık» qaýymdastyǵynyń jetekshisi Ikramjan Hashımjanov, oblystyq Qoǵamdyq kelisim keńesiniń múshesi Baıdýlla Qonysbek, oblystyq Analar keńesiniń tóraıymy Balhııa Kómekbaeva, oblystyq ardagerler keńesiniń tóraǵasy, Qoǵamdyq kelisim keńesiniń múshesi Jeńisbek Máýlenqulov, OQO QHA janyndaǵy Ǵylymı-sarapshylyq toptyń jetekshisi, professor Asma Qalybekova sóz sóılep, elimizde ýaqtyly qolǵa alynǵan bastamany biraýyzdan qoldaıtyndyqtaryn jetkizdi. Tilderdi damytýdyń respýblıkalyq úılestirý-ádistemelik ortalyǵy usynǵan qazaq tiliniń latyn grafıkasyna negizdelgen əlipbı jobasyn osyndaı otyrystar men jıyndarda jan-jaqty saralap, taldap, talqylaýǵa shaqyrdy.
– О́zbekstan, Túrikmenstan jáne Ázerbaıjan sııaqty túrki tildes elder latyn álipbıine áldeqashan ótti, – dedi Qazaqstandaǵy ózbekter qoǵamdyq birlestikteri «Dýstlık» qaýymdastyǵynyń jetekshisi Ikramjan Hashımjanov. – Elbasynyń qaǵıdatty másele dep aıtatynyndaı bar. Keńes ımperııasynyń ulttarǵa jasaǵan shovınıstik pıǵyldary kóptegen býynǵa otarshylyqtyń ýyn ishkizip, rýhsyzdandyrý maqsatyna jumys jasady. Azat eldiń balasyna ondaı quldyq qamyt kerek emes. Ekinshiden, álemniń 80 paıyzǵa jýyǵy aǵylshyn tilinde sóıleıdi. Latyn álipbıi halyqaralyq tildi meńgerýge de járdem beredi. Sondyqtan da biz Elbasynyń tapsyrmasynyń oryndalýyna birigip kúsh jumsaımyz.
Baqtııar TAIJAN, «Egemen Qazaqstan»
Ońtústik Qazaqstan oblysy