Jyl sońyna deıin elimizdegi qarjy naryǵy turaqtanyp, ishki ónimniń jalpy kólemi ortasha eseppen 3 paıyzdy quramaq. Bul týraly Ulttyq bank tóraǵasy Danııar Aqyshev Almatyda ótken otandyq BAQ ókilderimen kezdesýinde málim etti.
El ekonomıkasyn damytýdyń negizgi tetikteri men qarjy naryǵyn qalypty ustaý máseleleri basqosýdyń negizgi ózegine aınaldy. Bas bankırdyń aıtýynsha, Ulttyq bank qarjy naryǵyndaǵy ózgeristerdi tıimdi ıgerip, teńgeniń qunyn nyǵaıtý úshin barlyq ońtaıly jaǵdaılardy jasaıtyn bolady. Degenmen, bul tek birjaqty sheshiletin másele emes. Teńge qunyn tegeýrindi ustaý úshin ekonomıkanyń ár salasynyń qarym-qýaty básekege qabiletti bolýy shart. Qazirgi tańda el ekonomıkasy shıkizatqa táýeldi. Sondyqtan álemdik shıkizat pen qarjy naryǵyndaǵy kez kelgen ózgerister ekonomıkaǵa tikeleı áserin tıgizedi. Ásirese, munaı-gaz baǵasynyń qubylýy asa mańyzdy. О́ıtkeni, el eksportynyń 55 paıyzy osy energetıkalyq otynnyń úlesinde. Osyǵan oraı qarjygerler aldaǵy ýaqytta ekonomıkanyń tiregine aınalatyn basqa da salalardy damytýdyń mańyzdylyǵyn aıtty. Basqosý barysynda Ulttyq bank tóraǵasy árbir ózgeristi buqaraǵa jetkizýde BAQ ókilderimen tyǵyz ári ashyq baılanys ornatatynyn tilge tıek etti.
– Ulttyq bank turaqty negizde naryqqa qatysýshylarǵa jáne halyqqa Ulttyq banktiń qyzmeti jáne ol qabyldap jatqan sharalar týraly, onyń ishinde buqaralyq aqparat quraldary arqyly habarlaıdy. BAQ-pen barynsha tıimdi jumys isteý úshin, sondaı-aq, aqparattyq ashyqtyqty qamtamasyz etý jumysynyń sheńberinde Ulttyq bank kommýnıkasııalyq baılanystardy nyǵaıtý jóninen júıelik jumysty júrgizedi. Bizdiń qyzmetimiz ashyq. Biz ózara is-qımyl jáne barynsha baılanystardy retteý, sondaı-aq, buqaralyq aqparat quraldarymen keri baılanys ornatýdyń mańyzdy quraly retinde, osyndaı kezdesýler tájirıbesin jalǵastyrýdy josparlap otyrmyz, – deıdi Danııar Aqyshev.
Sonymen qatar, árbir azamattyń banktermen baılanysyn nyǵaıtý maqsatynda birneshe tıimdi qyzmet júıeleri iske qosylǵan. Ol arqyly azamattar ózine qajetti operasııalardy oryndaý úshin bank bólimshelerine kelmeı-aq, áleýmettik jelilerdiń kómegimen tólemder júrgizip, ózge de qarjylyq qyzmetterge qol jetkize alady.
Shara sońynda jınalǵan jýrnalıster Ulttyq bank tóraǵasymen birge kassalyq operasııalar jáne qundylyqtardy saqtaý ortalyǵynyń jumysymen tanysty. Bir aıta keterligi, sońǵy ýaqyttary el turǵyndary tarapynan altyn quımalarǵa degen suranys arta túsken. Buǵan dálel, sońǵy úsh aıda 10-nan 100 gramǵa deıingi 900 altyn quıma satylǵan. «Quıma altyndar óz kezeginde basy artyq aqshany ınflıasııadan qorǵaýdyń senimdi quralyna aınalmaq. Baǵaly metaldy qaıta satýdyń esh qıyndyǵy joq», deıdi mamandar.
Arman OKTIаBR, «Egemen Qazaqstan»
ALMATY