Aqparat jáne kommýnıkasııalar mınıstri Dáýren Abaev óziniń feısbýk paraqshasynda jarııalaǵan vıdeojoldaýynda aqparat jáne kommýnıkasııalar salasynda talqylanyp jatqan zań jobasyndaǵy «Jýrnalıstik etıka» normasynyń negizderin túsindirip berdi.
– Memleket túrli zańsyzdyqtarmen kúreste kómekke keletin «tórtinshi bılik» ókilderine qoldaý kórsetýge yntaly. «Jýrnalıstik etıka» normasy – obektıvtilik, zańdylyq, shynaıylyq, azamattardyń jeke ómirin, ar-namysyn,abyroıyn qurmetteýge negizdelgen. Atalǵan pýnkt oryndalmaǵan jaǵdaıda jazaǵa tartylmaıdy. Soǵan qaramastan, keıbir BAQ ókilderi bul normany zańǵa engizýdiń qajeti joq dep júr. Biz olaı sanamaımyz, – degen Dáýren Abaev atalǵan normany iske asyrýdyń mańyzyna toqtalyp ótti.
– Nege deseńiz, byltyr Almatyda ótken terrakt kezin eske alaıyq. Qalany jalǵyz terrorıst basyp aldy. Sanaýly mınýttarda-aq qanshama daqpyrt tarady. Osynyń kesirinen keı buqaralyq aqparat quraldarynda tekserilmegen aqparattar jarııalanyp jatty. Bul jaǵdaı kásibı qadamǵa jatpaıdy. Jýrnalıstik etıka prınsıpterin asa kúsheıtý qajet. Osy turǵydan kelgende bul eń eldymen jýrnalısterdiń bedelin artyrýǵa arnalǵan qadam, – deıdi mınıstr.
Mınıstrdiń aıtýynsha, sońǵy jyldary memlekettik uıymdarǵa jýrnalıster tarapynan túsetin ótinish on esege artqan. «BAQ týraly» zańǵa engizilgen túzetýlerdiń biri memlekettik organdardyń jýrnalısterdiń saýalyna 15 kún ishinde jaýap qaıtarýyna qatysty bolatyn. Bul túzetýdiń anyq-qanyǵyn mınıstr bylaısha túsindirdi:
«Ýaqyt az bolǵany sebepti memlekettik organdar nemquraıly jaýap berip jatatyny ras. Álemdik tájirıbeni eskere otyryp, sapany qalypqa keltirý maqsatynda jaýap berý merzimin 15 kúnge deıin uzartýdy usynyp otyrmyz. Bul rezonans týdyratyn máselelerge qatysty emes. Resmı habarlamaǵa beriletin jaýap merzimin 3 kúnnen 2 kúnge qysqarttyq. Iаǵnı, memlekettik organ málimdeme jasaǵanda, osyǵan qatysty jýrnalıst saýal joldasa, onyń jaýaby eki kúnnen keshiktirilmeı berilýi tıis», dedi ol.
Aıa О́MIRTAI,
«Egemen Qazaqstan»