Qyzdarǵa ásemdik jarasady

Balýan Sholaq atyndaǵy sport saraıynda musylman qyz-kelinshekterge arnalǵan, ulttyq aıshyqtaǵy zamanaýı kıim úlgileriniń respýblıkalyq «Ásem kıim – áıel kórki – 2011» baıqaýy qorytyndylandy. Almatyǵa jumys saparymen kelgen Elbasy Nursultan Nazarbaev joǵary bilikti ımamdardy, ıslamtanýshylar men dintaný­shy­lardy, arab tili men áde­bıeti­niń aýdarmashylaryn daıarlaıtyn Nur-Múbárak Egıpet Islam ýnıversıtetinde bolyp, dinı tálim alyp jatqan túlektermen kezdeskeninde qazaq ultynyń musylman halyq ekendigin, bizge musyl­man­dyǵymyzdy, qazaqtyǵymyzdy saq­tap qalý úshin eshqashan da ulttyq qundylyqtarymyzdan, ádet-ǵur­py­myzdan kóz jazbaýymyz kerektigin, jas mamandardyń kúni er­teń úlken din qaıratkeri bop qa­lyptasyp, memlekettiń táýel­siz­digin nyǵaıtýǵa úles qosatyn­dyq­taryn basa aıtqan edi. Sol kezdesýde Qazaqstan musylman­dary dinı basqarmasynyń tór­aǵa­sy, Bas múftı Ábsattar qajy Derbisáli osydan eki aı buryn Dinı basqarmanyń bastamasymen elimizdegi qyz-kelinshekterge ar­nal­ǵan ulttyq naqyshtaǵy mu­syl­man kıim úlgisine baıqaý ja­rııalanǵanyn, baıqaý nátıjesi jýyrda qorytyndy­lanatyn­dy­ǵyn jetkizgen. Mine, sol mejege jetip, qala tórindegi keń saraıda dúbirli jıyn bolyp ótti. Aıtýly sharany elimizdiń Bas múftıi, haziret Ábsattar qajy Derbisáli ashyp, baıqaýdyń mán-mańyzy jaıly qysqasha aıtyp ótti. – Ulttyq aıshyqtaǵy zamanaýı kıim úlgilerin tiktirý arqyly tek musylmanshylyqqa bet bur­ǵan qyzdardyń máseleleri sheshilip qana qoımaıdy, sonymen birge qazaqylyǵymyzdy nasıhattaý­ǵa, nyǵaıtýǵa úlken múmkindik bolady. Bul arqyly eń áýeli biz qyzdarymyzdy qazir jahandy jaı­lap jatqan jalańashtaný saıa­satynan saqtap qalamyz. Ultty­ǵy­myzdy saqtap qalýdyń bir jo­ly – ulttyq kıimderimizdi keńi­nen nasıhattaý. Tek nasıhattaý emes, ony kúndelikti ómirde kıip júrý. Dinı basqarmanyń qolǵa alyp otyrǵan isi keshegi joǵalt­qan qundylyqtardy qaıta jan­dandyrýdyń, musylmandyq pa­ry­zy­myzdy oryndaýdyń áreketi. Osy shara arqyly ımanyn oı­laǵan aıaýly qarakózderdiń kıim jaıly máselelerin sheshýge úles qosqan bolsaq, maqsatymyzdyń oryndalǵany, – dedi Bas múftı sóılegen sózinde. Áýret jerlerdi qymtap ustaý, sharıǵatqa saı kıiný belgili bir aǵymnyń belgisi emes. Adamǵa namaz oqý, oraza ustaý qandaı buı­ryq bolsa, Qurannyń talaby­na saı kıiný de dál sondaı buı­ryq etilgen. Endeshe, Dinı bas­qarma bastap, elimizdiń betke ustar iri kompanııalary qoldap, aıtýly azamattarymyz qazylyq etken bul baıqaýdyń qazaqqa bereri kóp. Olaı bolsa, bul baı­qaý­ǵa eki júzge tarta kıim úlgisi qatysyp, sonyń alpysy iriktelip alynǵanyn da aıta ketsek deımiz. Eń ǵajaby, jańa úlgide jınaqy etip tigilgen, ulttyq naqyshqa baı kıim úlgilerin kıgen qyzdar legi sahna tórine kóterilgende jıyl­ǵan kópshilik bir jaǵy qýa­nyshtan, bir jaǵy ulttyq maqta­nysh­t­an bolar, tolassyz qol soǵýmen boldy. Qazylardyń talabynan súrin­beı ótip, kórermenniń iltıpatyna bólengen úzdik kıim úlgisi retinde bas báıgeni «Erke Nur» sán teatry usynǵan «Qarakóz» sándi kıim úlgileri toptamasy jeńip alsa, birinshi oryn Gúljan Rys­bekovaǵa, ekinshi oryn Ǵalııa Qaı­daýylqyzy men Zúlfııa Aqa­taeva­ǵa buıyrdy. Al úshinshi orynǵa Toǵjan Rymbaeva, Maıra Ahmetova, Nazgúl Semǵalıevalar ıe boldy. Bes yntalandyrý júl­desi men demeýshilerdiń arnaýly syılyqtary jas dızaınerler Aısha Keńesbaı, Dınara Parmanova, Indıra Birtýbaeva, Gúlqaı­sha, Dosjan, Fatıma Bızaqova­lar­dyń enshisine buıyrdy. Kıim kııýdiń de óner ekendigin, ár ulttyń bet-beınesi men má­denıetiniń kelbeti ekenin ta­nyt­qan bul baıqaýdan túıgenimiz, jahannyń túkpir-túkpirinde ár túrli ulttar musylman dinin usta­nyp, sharıǵı talaptarǵa saı kıingenimen, ár ult óziniń ulttyq reńin joǵaltpaǵan kezde ǵana eliktep-solyqtaýdan azat, shy­naıy musylman ekendigin pash etetindigine jurttyń kózi jetip, kóńili sendi deýge bolady. Iá, qara tústi matadan tigilip, tek kózdi ǵana ashyq qaldyratyn kıim úlgileri qasıetti Quranda pa­ryz etilmegenine bul shara barshanyń kóńilin oıatyp, kózin ashty deýge bolady. Baıqaýdyń qorytyndy keshinde qazaq estradasynyń juldyz­dary Qanat, Aıtkúl Qudaı­ber­genovter, «Seriler», «Jigitter» toby jáne basqa da ónerpazdar jyrdan shashý shashty. Balýan Sholaq sport saraıyna jıylǵan kópshilik bul shara keler jyly da óz jalǵasyn tabady degen senimmen tarqasty. Qanat ESKENDIR. Almaty. Sýretterdi túsirgen Azamat QUSAIYNOV.