«Qazaqstannyń 100 jańa esimi» jobasy sheshýshi kezeńge jaqyndady

Otyrysty Aqparat jáne kommýnıkasııalar mınıstri D.Abaev ashyp, qysqasha sóz sóıledi. «Elbasy usynǵan «Rýhanı jańǵyrý» baǵdarlamalyq maqalasynyń aıasynda qolǵa alynǵan bul joba ónerimen, bilimimen, qoǵamǵa sińir­gen eńbegimen, erekshe qa­sıetterimen daralanǵan talantty azamattardyń tanylýyna úlken múmkindik týǵyzyp otyr. Jańa esimderdi anyqtaýǵa jurtshylyq ta joǵary belsendilik kórsetýde», deı kelip, ol bıylǵy 7 maýsymnan bastap 15 qyrkúıekke deıin elimizdiń túkpir-túkpirinen jobaǵa qatysýshylardan ótinishter qabyldanǵanyn jetkizdi. Olar «El.kz» portalynda tirkelip, uzyn sany 2212 adamǵa jetken. Mınıstr qazir olardy irikteý jumystary júrgizilip jatqanyn, sonymen qatar olardyń tabystylyǵynyń syryn aqparat quraldarynda jan-jaqty kórsetý jumystary qolǵa alynǵanyn aıtty. «Halyqqa olardyń tabystylyǵynyń syryn tanytar bolsaq, bul sharanyń tárbıelik ári ıdeologııalyq turǵy­dan óz jemisin beretinine biz senim­dimiz. Qazir Aqparat jáne kommýnı­kasııalar mınıstrligi men Qazaq­stan halqy Assambleıasy osy maqsatty iske asyrý boıynsha júıeli isterdi qolǵa alýda. Atap aıt­qanda, 100 jańa esimniń biri atanýǵa úmitker azamattar týraly derekti fılmder sıkly túsirilýde», dedi mınıstr. 

Osydan keıin jınalǵandarǵa mysal retinde «Astana» telearnasy túsirgen fılmnen úzindi kórsetildi.

Osydan ári D.Abaev fılm qam­ty­ǵan azamattardyń birne­sheýin atap ótti. Máselen, Aqtóbe qalasyndaǵy múgedek jan Sha­han Joldasbaevtyń týǵan shahar­yn­daǵy ǵımarattarǵa pandýs ja­saý­dy uıymdastyrǵanyn, Shyǵys Qazaqstan oblysynyń bes myń adamdyq shaǵyn kentinde tura­tyn Valentın Alıfanovtyń bala­lar­dyń óner mektebinde jańa teatr bólimin ashqanyn jetkizdi. Sońǵy­synyń shákirtteri qazir balalar arasynda ótetin halyqaralyq konkýrstarǵa qatysyp, báıge alyp júrgen kórinedi.

QHA Tór­aǵa­synyń orynbasary Darhan Myń­baı jumys tobynyń alǵa qoıylǵan maqsat jolynda úlken is-sharalar atqarǵanyna rızashylyq bildire kelip, tirkelgen azamattardyń tabystylyǵynyń syry, olardyń júrgen joldary týraly «Uly Dalanyń jańa esimderi» degen atpen áleýmettik jelide de top qurylǵanyn aıtty. Jalpy, onda tartylǵan adamdardyń sany 6 myńnan asyp ketipti. Qazir olardy qoldaý men talqylaýlar júrip jatyr. Sonymen qatar, 15 qyrkúıekte ótinimder qabyldaý aıaqtalyp, endi ári qaraı jumystar mınıstrlikpen birlesip jasalady, dedi ol. D.Myńbaı Assambleıa qurylymdarynyń bul is-sharaǵa aıryqsha belsendilikpen qatysqanyn atap ótti. Olardyń qatysýymen 520 adamnyń ómirbaıandary tirkelipti, al tús­ken usynystardyń sany 900-ge jýyq eken. Assambleıalyqtar tizim­ge usynǵan kandıdattardyń qatar­ynda ol mysalǵa, «Rodına» aýyl­dyq okrýginiń ákimi Bela Gazdıe­vany atap, onyń óz jumysyn bel­sen­dilikpen atqaryp, úzdik usynys­tarymen kózge túsip júrgenin, sonymen qatar, 26 jasynda kan­dıdattyq dıssertasııa qorǵaǵanyn jetkizdi. Sondaı-aq, Shyǵys Qazaqstan oblysynyń 28 jasar turǵyny Qýanysh Jumabekov aǵylshyn tilin jeńil jolmen úırený oqýlyǵyn jasap, onyń úzdiktigin túrkııalyqtarǵa moıyndatyp, sol elde bastyrǵan jáne ózi birneshe tildi meńgergen polıglot, aýdarmashy, ǵalym eken. Buryn esimderi halyqqa belgisiz bolyp kelgen azamattarymyz kóp jáne olar qazaq pen orys arasynan ǵana emes, Qazaqstanda turatyn barlyq etnos ókilderi arasynan shyqqan, dedi ol.

Al «As­tana qalasy teledıdary» JShS bas dırektory Lázzat Tanysbaı jurtqa jańa kórsetilgen fılm sııaqty 10 derekti týyndy túsirilip, onyń bári efırden beriletinin jetkizdi. «Bizdiń qyz­met­kerlerimiz bul jumystarǵa belsen­e kirisip, shyǵarmashylyq shabyt­pen jumys isteýde. Jańa esimderdiń kóbin bizdiń jýrnalıs­terimiz buryn bilmegen, endi olar­men etene tanysa kelgende ózderi­niń tańyrqaýlaryn jasyra almaý­da. Buryn biz kez kelgen salanyń jurtqa belgili adamdaryn ǵana kórsetip, maqtanysh etetin bolsaq, endi ónerleri men tabysty isteri halyqqa bilinbeı kelgen talantty adamdardyń bizde óte kóp ekenine kóz jetkizip jatyrmyz», – dedi ol.

«Qazkontent» AQ basshysy Evge­nıı Ko­che­tov «El.kz» portalyndaǵy «100 ja­ńa esim» boıynsha aý­qymdy jumys jasaǵanyn, saıtqa kelgen barlyq ótinish qabyl­dan­ǵanyn aıtty. «Biz jumystyń birinshi kezeńinde jergilikti atqarýshy organ­dar­men yntymaqtasyp, olardyń usy­nystaryn jınadyq, endi 1 qazannan aıdyń aıaǵyna deıin jumystyń ekinshi kezeńin bastap, osy saıttaǵy esimderge halyqtyń onlaın rejimde daýys berýin uıymdastyrdyq. Sonymen birge úmit­kerlerdiń jeńimpaz bolýynyń eń basty krıterııi – Elbasynyń baǵdarlamalyq maqalasynda aıtylǵanyndaı, Táýelsiz Qazaqstan úshin aıryqsha mańyzdy eńbek etkendiginiń moıyndalýy», – dedi ol. Sonymen birge ol jınalǵandarǵa saıtta kórsetilgen daýys berýdiń tártibi týraly baıandap berdi.

Otyrysta bulardan basqa da jumys toby men sarapshylardyń birneshe belsendileri sóılep, ózderiniń istegen jumystary men usynystaryn ortaǵa saldy. Jıyndy Aqparat jáne kommýnıkasııalar mınıstri D.Abaev qorytyndylap, portalǵa esimderi engen barlyq adam belgili bir tabysqa qol jetkizgender, ıaǵnı olardyń árqaısysy bir jetistiktiń tarıhy ekenin aıta kelip, BAQ olardy halyqqa tanytýda aıanbaı eńbek etýleri kerektigin aıtty.

Sýretti túsirgen  Orynbaı BALMURAT, «Egemen Qazaqstan»