Jambyl oblysynyń Baızaq aýdanynda ornalasqan «Áýlıe-Ata Fenıks» jaýapkershiligi shekteýli seriktestiginiń qus fabrıkasy jylyna 4000 tonnaǵa deıin broıler etin óndiredi. Osydan 9 aı buryn paıdalanýǵa berilgen atalmysh fabrıka qazirgi ýaqytta ónimdi jetkizý geografııasyn keńeıtý boıynsha jumys istep keledi. Sonymen qatar óndiristi odan ári damytýdy josparlap otyr.
Jobanyń jalpy quny 2 mıllıard teńgeni quraıdy. Al atalǵan qarjynyń 1,2 mıllıard teńgesi «QazAgro» holdınginiń qurylymyndaǵy kompanııa «QazAgroQarjy» aksıonerlik qoǵamy arqyly qarjylandyrylady. Kásipkerlikti qoldaý jáne ony nasıhattaý maqsatynda «QazAgro» holdıngi Baızaq aýdanyna jýrnalıster úshin týr uıymdastyryp, oǵan respýblıkalyq gazetter men telearnalardyń Jambyl oblysyndaǵy menshikti tilshileri, sondaı-aq oblystyq basylymdardyń tilshileri qatysty. «Áýlıe-Ata Fenıks» jaýapkershiligi shekteýli seriktestiginiń dırektory Farıda Júnisova jýrnalısterge suhbat berip, fabrıkanyń búgingi tańdaǵy tynys-tirshiligimen tanystyrdy. «Búginde kásiporyn «Halal» standarty boıynsha joǵary sapaly qus etiniń óndirisin jolǵa qoıdy jáne jyl basynan beri 3 myń tonnadan astam ónim shyǵardy. Alǵashqy eksport Reseı memleketine shyǵaryldy. Endi basqa elderge de eksporttyq múmkindikterdi keńeıtý maqsatynda kelissózder júrgizilýde», deıdi F.Júnisova. Sondaı-aq kásiporyn basshysy qus ónimi Qazaqstannyń barlyq aımaqtarymen qatar, Astana qalasyn da qamtıtyndyǵyn aıtyp ótti.
О́ndiris orny negizinen 1978 jyly salynǵan. Alaıda toqsanynshy jyldardaǵy kúrdeli kezeńde jumys istemeı qalǵan kásiporyn túıetaýyq ósiretin eski qus fabrıkasynyń bazasynda qurylǵan. Al jobany iske asyrý barysynda 16 taýyqqoraǵa, qoımalarǵa, zerthanaǵa jáne ákimshilik ǵımaratyna kúrdeli jóndeý júrgizilgen. Sondaı-aq soıý jáne qospajem sehtary qaıta qalpyna keltirilip, ınkýbator úıi salynǵan. Bul turǵyda memlekettiń de qoldaýynyń asa mańyzdy ekenin atap ótken jón. Máselen, «Bıznestiń jol kartasy-2020» baǵdarlamasy sheńberinde nysan qurylysy kezinde 547 mıllıon teńgege kommýnıkasııalyq júıelerdiń keńeıtilgen jelisi júrgizilgen.
Kásiporyn basshysy fabrıkanyń bolashaq josparlarymen de bólisti. «Aldaǵy ýaqytta «QazAgro» holdınginiń qoldaýymen kásiporynnyń qýatyn 20 myń tonnaǵa deıin jetkizý josparda bar. Qus sharýashylyǵy kesheni óńirde 40 saýda ornyn ashýǵa múmkindik beredi», deıdi Farıda Amansaryqyzy.
Jalpy, Qazaqstannyń qus sharýashylyǵy salasynda 2010 jyldan bastap otandyq qus fabrıkalarynyń óndiris kóleminiń ósimi 136,4 paıyzdy qurap otyr. Sondaı-aq sala damýynyń oń dınamıkasyna «QazAgro» ulttyq holdınginiń ınvestısııalyq jobalardy qarjylaı qoldaýy yqpal etkenin de aıtyp ótý kerek.
Jambyl oblysy boıynsha «QazAgro» holdınginiń ınvestısııalyq qorjynynda quny 8,4 mıllıard teńgeniń jobasy bar. Sonymen qatar Baızaq aýdanyndaǵy «Áýlıe-Ata Fenıks» qus fabrıkasy jáne T.Rysqulov aýdanyndaǵy «Lýgovoı jylqy zaýyty» jaýapkershiligi shekteýli seriktestigi oblystaǵy eń iri jobalar qataryna jatady. Aıta keteıik, aǵymdaǵy jyly oblysta «QazAgro» jelisi boıynsha 900,1 mıllıon teńgege 7 nesıe seriktestikteri qarjylandyrylǵan. Aldaǵy ýaqytta da atalǵan seriktestikter Áýlıeatanyń áleýetin arttyratyn jobalar qatarynan kórinetin bolady.
Hamıt ESAMAN,
«Egemen Qazaqstan»
Jambyl oblysy