Mereı ósiretin kórinis

El Táýelsizdiginiń 20 jyldyǵyn atap ótý aýqymynda belgilengen sharalar aıasynda 25-26 qazan kúnderi Astana qalasynda Almaty, Batys Qazaqstan jáne Pavlodar oblysta­ry­nyń kúnderi ótýde. Keshe Memlekettik hat­shy­ Qanat Saýdabaev pen Astana qalasynyń ákimi Imanǵalı Tasmaǵambetov oblys kúnderi sheńberinde uıymdastyrylǵan óńirlerdiń aýyl­sharýashylyq taýarlary jármeńkesin aralap kórdi. Memlekettik hatshy aldymen «Dýman» oıyn-saýyq ortalyǵy janyndaǵy alańda ornalasqan Batys Qazaqstan oblysynyń jármeńkesin aralady. Oblys ákimi Baq­ty­qoja Izmuhambetov Memlekettik hatshy men Astana qalasynyń ákimine óńirdiń áleýmettik-ekonomıkalyq damý jetistikteri týraly baıandap, Edil men Jaıyq óńirinen jetken jármeńkedegi aýylsharýashylyq ónimderimen tanystyrdy. Odan keıin Qanat Saýdabaev pen Iman­ǵa­lı Tasmaǵambetov Astana qalasy ákimdigi aldyndaǵy ortalyq alańda qanat jaıǵan Pav­lodar oblysynyń jármeńkesine atba­syn tiredi. О́ndiristi óńir basshysy Baqyt­jan Saǵyntaev órkeni ósken óńirdiń tabys­ta­ryn tilge tıek ete kelip, oblystaǵy aýyl sharýashylyǵy eńbekkerleriniń osy jár­meń­kege ákelgen tartý-taralǵylarymen ta­nys­tyrdy. Pavlodar oblysy bas qalamyzda uıymdastyrylǵan jármeńkege 800 tonnadan astam sapaly azyq-túlik taýarlaryn jet­kizipti. Tamyljyǵan tabıǵatyna el Táýelsiz­di­giniń 20 jyldyǵy ishinde qol jetkizgen jetistikteri saı Jetisý óńiriniń eńbekkerleri oblys kúnderi aıasynda ótip jatqan sharalarǵa óńirde óngen mol ónimderimen qosa, óner tartýlaryn da molynan jetkizgen eken. Qanat Saýdabaev elimizdiń bas qalasy – Astanada ótip jatqan oblystar­dyń kúnderi aıasyndaǵy bul azyq-túlik taýarlary jármeńkesi men mádenı-rýhanı sharalardyń mereke qarsańynda jurt­shy­lyqtyń rýhyn asqaqtatatyn áleýmettik mańyzdylyǵyn atap kórsetti. Jylqybaı JAǴYPARULY.