Qaraǵandyda osymen 4-shi ret uıymdastyrylǵan «Jan shýaǵy» atalatyn bul baıqaýǵa qatysýshylar az bolmady. Týmasynan aıaq-qoly kem, kózi zaǵıp jaratylyp, taǵdyrdyń aýyr kúıine ushyrasa da talaptary taýdaı jetkinshekter adam qabileti qandaı da qıyndyqta shektelmek emestigin pash etti. Olar órnektegen qol óneri týyndylary, kestelegen tabıǵat kórinisteri, ár túrli sazdy aspaptarda oınaý mashyqtary, áýeletken ásem ánderi sony aıǵaqtady.
Baıqaý qorytyndysynda 12 jasar Aleksandr Brıýhov, turǵylastary Gákký Álimhanova, Natalıa Sorokına ónerleri laıyqty baǵasyn aldy. Talanttary tanylǵan basqa da balalar atalǵan sharany qoldaýshylar men demeýshiler tartqan syı-sııapat qýanyshyna bólendi.
Aıqyn NESIPBAI.
Qaraǵandy.