Qazaqstanda 27 myń jetim jáne ata-anasynyń qamqorlyǵynsyz qalǵan bala baryn atap ótti.
Bul máseleni Ortalyq kommýnıkasııalar qyzmetinde ótken baspasóz konferensııasynda Qazaqstan Respýblıkasy Bilim jáne ǵylym mınıstrligi Balalardyń quqyqtaryn qorǵaý komıtetiniń tóraǵasynyń mindetin atqarýshy Erjan Ersaıynov, «Dara» qorynyń prezıdenti Mádına Bakıeva, «Bala otbasynda ómir súrýi tıis» JQ jetekshisi Sholpan Baıbolova, psıholog jáne bala asyrap alýshy Elena Gendrıkson, bala asyrap alýshy Marat Qabylbaev talqylady.
«Bul elimiz boıynsha jalpy bala sanynyń 0,5 paıyzyn quraıdy. Onyń ishinde 21 myń bala qazaqstandyq azamattardyń qamqorlyǵymen asyrap alynsa, 6 myńnan astamy jetim jáne ata-anasynyń qamqorlyǵynsyz qalǵan balalarǵa arnalǵan 140 mekemede tárbıelenip jatyr» dedi Erjan Ersaıynov.
Sonymen qatar ol ata-anasynyń qamqorlyǵynsyz qalǵan balalardyń sanyn qysqartýdyń oń ózgeristeri baıqalatynyn baıandady.
«Máselen, 2014 jyly olardyń sany 6 myńnan assa, 2017 jyldyń basynda bul kórsetkish 2 myńǵa azaıǵan. Sońǵy eki jyldyń ishinde jetim balalarǵa arnalǵan mekemelerdiń sany 48-ge qysqardy (188-den 140 deıin). Jáne de 4 myńnan astam balalar úıiniń tárbıelenýshileri asyrap alyndy, 1145 bala qamqorlyqqa alyndy jáne 1862 bala óz týǵan ata-anasyna qaıtarylýynyń arqasynda otbasyn tapty. Sonymen qatar, sońǵy 10 jylda atalmysh mekemelerdiń tárbıelenýshileriniń jalpy kontıngenti 10000 balaǵa (2007 jylǵy 1 746-dan 2017 jyly 7236-ǵa deıin) azaıdy. Jyl saıyn elimizde 900-den astam erli-zaıypty ata-ana quqyǵynan aıyrylady, 3 myńnan astam búldirshin balalar úıine túsedi, 6 myńǵa jýyq bala beıimdelý ortalyqtaryna, ata-anasynyń qamqorlyǵynsyz qalǵan balalardyń 40 paıyzy bilim berý, densaýlyq saqtaý, áleýmettik damý ortalyqtaryna ornalastyrylady. Asyrap alýdan bas tartqannan keıin balanyń balalar úıine qaıta oralýy sııaqty jaǵdaılar da jıi oryn alady», dedi Erjan Ersaıynov.
Raýan QAIDAR,
«Egemen Qazaqstan».