15 qazan, jeksenbi kúni Qyrǵyzstanda prezıdenttik saılaý ótti. Eldiń konstıtýsııasy boıynsha saılaýǵa qansha adamnyń qatysqany sonshalyqty mándi emes. Al Ortalyq saılaý komıssııasynyń (OSK) aldyn ala jarııalaǵan málimetine qaraǵanda, saılaý ýchaskelerine 1 mıllıon 692 myń 423 saılaýshy daýys berýge kelgen. Bul saılaý quqyǵy bar azamattardyń 55,93 paıyzyn quraıdy.
Saılaý budan buryn júrgizilgen azamattardy bıometrıkalyq tirkeýdiń nátıjesi arqyly júzege asyryldy. Mundaı saılaýshylardyń jalpy sany 3 mıllıon 25 myń 770 adam bolatyn. Prezıdenttikke alǵashynda kandıdat retinde 12 adam tirkelgen edi. Onyń bireýi – «О́nigý-Progress» partııasynyń atynan túsken Baqyt Tórebaev saılaýǵa sanaýly kún qalǵanda óziniń kandıdatýrasyn Omýrbek Babanovtyń paıdasy úshin alyp tastady.
Saılaý bıometrıkalyq-elektrondy tártippen júrgizilgenine baılanysty daýys berý aıaqtalǵan keshki saǵat 20.00-den onshaqty mınýt ótkende kimniń alda ekendigi belgili boldy. Keshegi kúngi málimetke sáıkes, saılaý ýchaskelerine kelgenderdiń 55 paıyzǵa jýyq daýysyna Sooronbaı Jeenbekov ıe bolǵan. Endi ol OSK-nyń resmı qorytyndysynan keıin Qyrǵyz Respýblıkasynyń prezıdenti dep jarııalanbaq. Tehnıkalyq jaǵynan alǵanda saılaý ádil ótken. Muny halyqaralyq baıqaýshylar da rastap otyr. Bıometrıkalyq tehnologııa «1 saılaýshy – 1 daýys» erejesine negizdelgen. Biraq moraldyq-psıhologııalyq jaǵynan alǵanda, saılaýdy ádil ótti dep aıtý ázirge erterek sııaqty.
Sooronbaı Jeenbekov eldiń qazirgi prezıdenti basqaratyn Qyrǵyzstannyń sosıal-demokratııalyq partııasynan kandıdat retinde usynyldy.
Nazarbek SATTAR, arnaıy «Egemen Qazaqstan» úshin