Elimizdiń barlyq óńirinde kómir tapshylyǵy joq. Bul týraly búgin Úkimet otyrysynda Energetıka mınıstri Qanat Bozymbaev málimdedi.
«2017 jyldyń 9 aıynda 75,3 mln tonna kómir óndirildi. Bul 2016 jyldyń sáıkes kezeńimen salystyrǵanda 13,2 paıyzǵa artyq. Ishki naryqqa 54,7 mln tonna kómir jetkizildi. Onyń 41,1 mln tonnasy energııa óndirýshi káisiporyndarǵa jóneltildi. Eksport 21,1 mln tonnany qurady. Bul ótken jyldyń sáıkes kezeńimen salystyrǵanda 16,6 paıyzǵa kóp. Dál osy kezeńde kommýnaldyq-turmystyq qajettilikke jáne halyqqa 1 mıllıonnan astam kómir jetkizildi. Bul ótken jyldyń sáıkes kezeńdegi deńgeıden 26,8 paıyzǵa kóp», - dedi mınıstr.
Onyń aıtýynsha, jyl saıyn jylý berý maýsymy kezinde kommýnaldyq-turmystyq qajettik pen halyqqa syrtqy aýa temperatýrasyna baılanysty shamamen 10-112 mln tona kómir jetkiziledi. Bul sanatqa arnalǵan kómirdiń baǵasy ken ornyna baılanysty 2,5 myń teńgeni quraıdy. Qazirgi ýaqytta elimizdegi kómir óndiretin kásiporyndar turaqty jumys istep, kómir óndirý kólemin arttyra túsýde.
«Búgingi kúni elde kómir tapshylyǵy joq. Qyrkúıektiń ortasynda kúnniń kúrt sýýyna baılanysty ortalyq jáne soltústik oblystarda kómirge suranys arta tústi», - dedi ol.
Mınıstrdiń dereginshe, qazirgi ýaqytta Aqmola oblysynyń saýda núktelerinde 40-tan 700 tonnaǵa deıin, Almaty oblysynda shamamen 300 tonna, Jambyl oblysynda 490, Soltústik Qazaqstan oblysynda 600, Ońtústik Qazaqstan oblysynda 20 myń, Astanada shamamen 1 myń tonna kómir bar.